دونیادا ایکی آغجاقاناد وار ایدی. بیرینین آدی گؤزللر گؤزه‌لی آغچیچک، او بیرینین آدی ایگیدلر ایگی‌دی آغکیشی. اونلار لاپ خوشبخت یاشاییردیلار. آخشاملار سس-سسه وئریب اوخویوردولار. آغکیشینین هم گؤزل سسی واردی، هم ده کامانچا چالیردی. آغچیچک ده پیس اوخوموردو. ائله آخشام سوفره‌سی ییغیش‌دیریلان کیمی کونسئرت باشلاییردی. اول آغچیچک بیر زنگوله ووروردو. اینسافلا دئسک، هله هئچ بیر آغجاقاناد اونون کیمی زنگوله وورا بیلمه‌ییب. سونرا آغکیشی باشینی کامانچایا طرف اییب، نئجه یانیق‌لی چالیب اوخویوردوسا، قورباغالار بیر آندا اؤز سئویم‌لی ماهنیلارینی کسیب، بو گؤزل نغمه‌یه قولاق آسیردیلار.

اما بو ایشلر خیر-خیر قورباغانین هئچ خوشونا گلمیردی. گؤرون ایش هارا چاتمیش‌دی کی، او دورا-دورا آغکیشینین سسینه قولاق آسیردیلار. بیر دفعه قورباغالار پادشاهی گؤیگؤز قورباغا آمان-زامان بیر قیزینین تویونو ائل‌مک اوچون آغکیشینی چاغیردی. بونو ائشی‌دن خیر-خیر قورباغا نئجه برک‌دن خیریل‌دادی‌سا سسی تامام توتول‌دو. دی گل کی، خیر-خیر قورباغا فورصت تاپیب، آغکیشینی دیریگؤزلو اوددو. بو اهوالاتی ائشی‌دن گؤزللر گؤزه‌لی آغچیچک نئجه هؤنکوروب آغلادی‌سا گؤزون‌دن سو اوزینه ایکی قیغیلجیم دوش‌دو. اونون گؤزون‌دن یاش اوزینه قیغیلجیم دوشدویونو گؤره‌ن جیرجیراما سوروش‌دو:

-گؤزللر گؤزه‌لی آغچیچک، نه اولوب؟
-داها بون‌دان آرتیق نه اولاجاق. خیر-خیر قورباغا ایگیدلر ایگی‌دی آغکیشینی اوددو. جیرجیراما بو سؤزو ائشی‌دن‌ده نئجه جیریل‌دادی‌سا بوتون جیریل‌دایان ایستول و چارپاییلارین سسی بیر آندا بات‌دی. هامی ائله بیل‌دی دونیادا جیرجیرامادان باشقا جیریل‌دایان یوخ‌دور. قارغا جیرجیرامانین بئله یانیق‌لی جیریلتی‌سینی ائشیدیب سوروش‌دو:

-نه اولوب؟

-داها بون‌دان آرتیق نه اولاجاق. خیر-خیر قورباغا ایگیدلر ایگی‌دی آغکیشینی نئجه یئییب‌سه، گؤزللر گؤزه‌لی آغچیچک گؤزون‌دن یاس اوزینه اود تؤکور. بیر گؤریدینیز بو زامان قارغا نئجه قاریل‌دادی. اونون قاریلتی‌سی بوتون دونیا قورباغالارینین قورولتوسونو باتیردی. آداملار فیکیرلش‌دیلر کی، قارغانین بو قاریلتی‌سینین جاوابین‌دا گرک او قدر قار یاغ‌سین کی، دوزو-دونیانی توتسون. بونو گؤره‌ن سایر بولبول سوروش‌دو:

-آی یایین اورتاسین‌دا قار یاغ‌دیرماق ایسته‌یه‌ن قارغا، نه оلوب؟

-داها نه اولاجاق؟ خیر-خیر قورباغا ایگیدلر ایگی‌دی آغکیشینی نئجه یئییب‌سه گؤزللر گؤزه‌لی آغچیچک گؤزون‌دن یاش اوزینه اود تؤکورموش. بولبول دوغرودان دا برک هیرسله‌ن‌دی. نئجه یانیق‌لی اوخودوسا باغچاداکی بوتون گوللر گؤزلرینی آچدیلار. سن دئمه، باغچادا بیته‌ن گوللر اصلین‌ده گول دئییلمیش، اونلار گوله اوخشایان قوشلار ایمیش و یای یوخوسونا گئدیبلرمیش. آداملار ایسه مورگوله‌یه‌ن بو قوشلاری گول آدلاندیریب اونلاری قوخولاییرمیش. ائه، آداملار هئچ نیین فرقینه وارمیرلار. ائله کی، قوشلار قیش یوخوسون‌دان دوردولار اوچوب هره‌سی بیر طرفه قاچ‌دی.