آنا صحیفه ادبیات |
بو گون شرقده ایلک دموکراتیک رئسپوبلیکا اولان آذربایجان خالق جومهوریتینین یارانماسیندان ۱۰۲ ایل کئچیر.
کولت. آذ بو موناسیبتله آذربایجانین ایستیقلال شاعری احمد جاوادین شعیرلرینی تقدیم ائدیر.
سوسمارام!
"من بیر قولام، یوک آلتیندا ازیلمیشهم، قارداشیم،
سئوینج بیلمز بیر مخلوقام، آه و زاردیر سیرداشیم.
دامغا ووروب، زنجیرلهییب توللامیشلار زیندانا،
قارلی-بوزلو جهنملر مسکن اولموشدور مانا.
مانا دینمه، سوس دئییرسن، نه واختاجان سوساجام،
بحرانلارین، هیجرانلارین، محبسینده قالاجام؟
نیه سوسوم، دانیشماییم، اینسانلیقدا پاییم وار،
منیم آنا وطنیمدیر تالان اولان بو دیار.
نیه سوسوم، دانیشماییم، تورک یوردودور بو توپراق،
اوغوزلارین، ائلخانلارین وطنینده کیمدیر، باخ!
بو دونیادا آزادلیغی شان شهرتدن اوستون توت،
آلچاقلیغی، یالتاقلیغی رزیللیگی سن اونوت!
نئجه سوسوم، دانیشماییم، من ائیلییم خیانت؟
هانی سئوگی، هانی وطن، ده هاردا قالدی میللت؟
من بیر قولام، یئریم آلتون، سویوم گوموش، اؤزوم آج،
آتام محکوم، آنام سایل، الیم هر شئیه محتاج.
من تورک اؤولادییام، درین آغلیم، زکام وار،
نه واختاجان چینیمیزده گزهجکدیر یاغیلار؟
نه قدر کی، حاکملیک وار، محکوملوق وار، من وارام،
ظلمه قارشی ایسیانکارام، ازیلسهم ده سوسمارام!"
چیرپینیردین قارا دنیز
"چیرپینیردین قارا دنیز
باخیب تورکون بایراغینا.
آه دئیردین، هئچ اؤلمزدین
دوشه بیلسهم آیاغینا!
آیری دوشموش دوست ائلیندن
ایللر وار کی چارپار سینهن.
وفالیدیر گلدی گئدن
یول وئر، تورکون بایراغینا!
دوست ائلیندن اسن یئللر
منه شعیر، سلام سؤیلر.
اولسون بیزیم بوتون ائللر
قوربان تورکون بایراغینا!
اینجیلر تؤک گل یولونا،
سیرمالار دوز ساغ-سولونا،
فیرتینالار دورسون یانا،
سلام تورکون بایراغینا!"
«نه گؤردومسه»
آرماغانیم یاسلی نغمه،
بیر قوش اولدوم، چیخدیم یولا.
گئتدیم گؤردوم دوست ائلینده
نه بیر سس وار، نه بیر لایلا.
سوردوم قریب مینارهدن:
"آخشام اولموش، اذان هانی؟
بایقوش قونموش مینبرلره،
دئیهن هانی، دویان هانی؟"
ویجدان منه امر ائدر کی:
"بئله گونده بایرام ائتمه".
قران منه یول گؤستریر:
"یوخسوللاری مایوس ائتمه".
«بیسمیللاه»
آتیلدی داغلاردان ظفر توپلاری،
یورودو ایرلی عسگر، بیسمیللاه.
او، خان ساراییندا چیچکلی بیر قیز،
بکلیور بیزلردن ظفر، بیسمیللاه.
ای حربین تالعی بیزه یول وئر، یول.
سن ای جوشان دنیز، گل، تورکه رام اول،
سن ای ساغا، سولا قیلینج ووران قول
قوللارینا قوت گلر، بیسمیللاه.
«قالخ»
قالخ، قالخ سارماشیقلی مزار آلتیندان
گلمیش زیارته قیزلار، گلینلر.
ای کاروان کئچیدی، یوللار اوستونده
هر گلن یولچویا یول سوران عسگر.
قوودوقلارین سنین یابانچی خانلار
قورتاردی اؤلکهمی تؤکدویون قانلار.
باخ، ناسیل اؤپمکده توزلار، دومانلار
قریب مزارینی، منله برابر.
بایراغیم
تورکوستان یئللری اؤپوب آلنینی،
سؤیلویور دردینی سانا، بایراغیم!
اوچ رنگین عکسینی قوزغون دنیزدن،
ارماغان یوللاسین یارا، بایراغیم!
گئدرکهن تورانا، چیخدین قارشیما
کؤلگهن دؤولت قوشو قوندو باشیما!
ایزن وئر، گؤزومده جوشان یاشیما
دینلتسین دردینی آها، بایراغیم!
قایی خان سویوندان آلدیغین رنگی،
قوجالمیش ائلخانلا موسلمان بگی.
ائلخانین اؤولادی، دینین دیرگی
گتیردین کؤنلومه صفا، بایراغیم!
کؤکسومده توفانلار، گلدیم ایرلی
اؤپوم کؤلگهن دوشهن موبارک یئری!
اللهین ییلدیزی، او گؤزل پری،
سیغینمیش قوینوندا آیا، بایراغیم!
تاریخ
2020.05.28 / 14:36
|
مولف
Axar.az
|