قادین یازارلاریمیزدان بیری تانینمیش ژورنالیست زهره وفایی اولموشدور. خانم وفایی ادبیات، تاریخ، فولکلور و کولتوروموزون مختلف ساحه‌لرینده چالیشمیش، اثرلر یاراتمیشدیر. اونون رولو ساتیریک ادبیاتیمیزدا دانیلماز و یوکسک یئرده‌دیر. اونون بوراخدیغی «جوالدوز» ساتیریک نشریه ایللرجه تایسیز اولوب، تایسیز دا قالاجاقدیر. خانیم زهره وفایی حئکایه ادبیاتی ساحه‌سینده ده چالیشمیش‌دیر.

بو يازي، ايسته‌يي اولانلار طرفيندن شكيل‌لنيب كيتاب كيمي ياييلا بيلير. ها بئله فيلمه و کارتون فيلمه چئوريله ‌بيلر. اوشاق‌لارا تياتری هيبتينده يئنه اجرا اولونا بيلير . ائل ادبياتيني اوشاق‌لارا تانيتماق اوچون هر بير يولو سينامالييق .

گونلرده بير گون بير شهرين اوزاق گوشه‌سينده بير اوچ قيللي كوسا ياشاييردي .اونون بير خانيمي – بير نئچه اوغلو و قيزي و بير نئچه آت، قويون، قوزو و ائششه‌یي وارايدي . بيرده بالا بير زمي‌سي وارايدي، كوسا اورادا گؤي– گؤيه‌رنتي اكيب بيچردي. كوسانين اوغلو بؤيوموشدو، ائولنديرمك زاماني چاتميشدير . كوسا بير آت اوغلونا وئريب، دئيير :

-اوغول! بو آتي آپار شهرين بازاريندا سات، پولونو گئتير سني ائولنديريم و سنه بير ياخشي توي توتوم! آمما شهرين بازاريندا آرادا دولانان حرامي‌لردن هادير اولارسان ها! يوخسا اونلار سني آلدادارلار !

اوغلان باش اوسته دئييب، آتي گؤتوروب، بازارا ساري يولا دوشر. بازاردا دولانان حرامي‌لر بو اوغلاني گؤروب اونو ياهالتماق اوچون پئشينه دوشرلر، بير به بير سوروشارلار:
-آي اوغلان بو کئچي‌ني نئچه‌يه ساتيرسان ؟
اوغلان آجيقلانيب دئیر:
-بو گئچي دئييل بو آت‌دير !

آما ايكينجي – اوچونجو – دؤردونجو ... حرامي سوروشاندان سونرا اوغلان اؤز – اؤزونه دئير: بلكه آتام كاريخيب آت يئرينه منه گئچي وئريبدير ساتام ! بو فيكيردن سونرا اوغلان آتي گئچي پولونا حرامي‌لره ساتيب ائوه قاييدار .

كوسا حال ماجراني ائشيدندن سونرا اوغلونا دئير : سني حرامي‌لر آلداديبلار ! من اؤزوم صاباح بازارا گئديب و اونلارلا حسابلاشمالي‌يام ! صاباح ايسه كوسا بير ائششك گوتوروب، بئش دانا قيزيل ليره اشرفي ده اووجونا آليب يولا دوشر . حرامي‌لر: "يئنه بير آلداتمالي كس گليب!" دئييب،كوساني دؤره‌له‌یرلر: آ كوسا! بو ائششگي نئچه‌يه ساتيرسان؟ كوسا دئير:

-مين تومنه ساتيرام.

حرامي‌لر دئيرلر:
-نه خبردير؟ مين تومنه ده ائششك اولار ؟
كوسا دئير:
-آخي بو عادي ائششك دئييل!
حرامي‌لر سوروشار:
-بس نه ساياق ائششك‌دير؟
-بو ائششك اوت- علف يئيه‌ر آمما قيزيل اشرفي سي...!

حرامي‌لر اينانمازلار. كوسا ائششگه بير بيز وورار و اووجوندا اولان اشرفي‌لرين بيريني چيخارديب حرامي‌لره گؤسترر . يئنه بير بيز ووروب، ديگر اشرفيني چيخاردار. طاماحكار حرامي‌لر اينانارلار و ائششگي مين تومنه كوسادان آلارلار! كوسا دئير:
-سيز قيرخ نفرسيز . منجه بو ائششگه قيرخ گونلوك اوت- علف وئرين و بير باغلي يئرده قويون. قيرخ گون سونرا گئدين هر بيرينيز بير اشرفي گؤتورون!

حرامي‌لر اينانيب، سئوينجك گئدرلر. قيرخ گون سونرا قاپینی آچارلار، گؤررلر ائششک اوت- علفي يئييب، دويونجا پئيين سي...! باشا دوشرلر كي، كوسا بونلاري آلداديبدير. آجيقلانيب، هر بيري بير قمه گؤتوروب، كوسانين ائوينه ساري يولا دوشرلر.
كوسا بو گونو گؤزله‌ييردي. اونا گؤره ده ايكي دانا تولكو آلميشدي. بيريني ائوده آغاجا باغلاييب، او بيريسيني اؤزو ايله برابر زمي‌يه آپارميشدي. ها بئله بير قويون باغيرساغينا بير آز خوروز قاني دولدورموشدو، اونو خانمينين بوغازينا دولاميشدي. خانيمینا دا تاپيشيرميشدي كي، شاما يئمك پيشيرسين آمما اونون دوزونو چوخ – چوخ تؤكسون!
حرامي‌لر هر ندن خبرسيز هاي- كوي‌له كوسانين ائوينه گلرلر. باغيرارلار:
-هاني او كوسا؟ بيز اونو اؤلدورمه‌يه گلميشيک!

خانيم دئير:
-كوسا زمي‌ده چاليشير! سيز ده اونو گؤرمك ايسته‌ييرسيز، اورايا گئدين!
حرامي‌لر زمييه گليب، كوسايا دئيرلر:
-آي كوسا! او ائششک ايله بيزي آلداديبسان؟
كوسا دئير:

-يوخ! آلداتماميشام. آمما اگر ايسته‌ييرسيز پولوزو گئري قايتاريم!
حرامي‌لر راضي اولارلار. كوسا دئير:

-اوزاق يولدان گليبسيز، بو گئجه‌ني قوناغيميز اولون!

حرامي‌لر موفته يئمك آدي ائشيديب، قبول ائدرلر. كوسا تولكونون بويون باغين آچيب، دئير:
-آ تولكو بالام! بيزيم ائوه گئت و خانيما دئه گينن شام پيشيرسين قيرخ قوناغيم وار!

تولكو باش گؤتوروب چؤله ساري قاچار . گئجه ائوه قاييداندا حرامي‌لر تولكونو ائوده گؤروب، چوخ تعجب ائدرلر. خانيم شامي گتيريب، يئمه‌يه باشلارلار. كوسا خانيما آجيقلانيب، دئير:
-بو يئمك ندن بئله شور اولوب دور؟

داوامی وار...