کولت. آذ یعقوب نیکـزاد این شعیرینی تقدیم ائدیر:

سنه باغلادیغیم اوره‌یی بوراخ
بو یولون اوزونه داش یامانیبدی
اوردا کوچه‌لرین گؤیلو- گؤزو توخ
بوردا قبیرلرده لئش یامانیبدی
قینانان سسلرده تیکان ایزی وار
یاشام دفترینده اؤلوم سؤزو وار
هله دیلیمیزده اؤزگه گؤزو وار
باهارین قوینونا قیش یامانیبدی
سئوینج اک وطنین یال ـ یاماجینا
بیر گولوش امیزدیر قارداش، باجینا
گوناهسیز گؤز گئدیر دار آغاجینا
قیلینجین دیلینه باش یامانیبدی
گؤزله هر آددیمدا قورولوب تله
گؤی‌لره اوچماغا داریخما هله!
شاید "پنجره‌دن یئنه داش گله"!..
منیم اوره‌ییمه قوش یامانیبدی