کولت. آذ بکیر چوبانزادنین " آنا دیلیم" آدلی شعیرینی تقدیم ائدیر:

من سنی " کیریمدا "، " کازاندا "(قازاندا) دویدوم
قلبیم اودلاناندا، قیزاندا دویدوم
یاد ائلده اوزولوب، آجی چکنده،
اومیدسیز گوُزومدن قان - یاش توُکنده
بوینونا ساریلیب دردیمی دئدیم،
بیر مونیس کلمندن دوزلدی قددیم.
شعیرین اولماسا، شرقین اولماسا،
بیرجه " یورد کلمه‌نله قلبیم دولماسا،
نئجه دولاشاردیم قوربت دییاردا؟
تانیشسیز، بیلیشسیز یاد دییارلاردا؟
بیلمیرم " تورکدور" " تاتاردیر " آدین ؟
آما چوخ شیرین سن " تانری "‌دان دادین !
" تورک" ده " تاتار " دا سنین سوُزوندور!
ایکیسی ده ایکی جوت محزون گوُزوندور.
ویانا اوُنونده، " کازاک " (قازاق) ایچینده،
برابر سسلندیک "هیند"لرده، "چین"ده،
گر آنلاسا سنی دوشمن ده سئور،
بیر شیرین سوُزونه دونیانی وئرر.
ایسته‌ییرم سنی هریاندا گوُروم،
هر یئرده اینجینله داستانلار هوُروم.
بوتون جانلیلارا اوُیره‌دیم سنی،
یئتیمین کوُنلوندن سیل قم-قوصصه‌نی.
جامییه، محرابا، سارایا دا گیر،
اوزاق دنیزلردن بیر خبر گتیر.
سنینله دوشمنه فرمانلار یازیم،
دیل آنلامازلارین کوُکونو قازیم!
قبریمده ملکلر سورغولار سورسا،
عزرائیل دیلیمی مین یول قوپارسا!
" اوُز آنا دیلیمده سوُیله " دئیرم
دیلیمده دانیشیب سونرا اوُلرم.
کوُنلومو قایغیلار، دردلر توتاندا،
یوردومون اولدوزو قفیل باتاندا
اوُز دیلیم! باشقا شئی گلمیر یادیم،
یالنیز سن چاتارسان منیم دادیما!