ادبیات‌چیلار آراسین‌دا ان چوخ سئویله‌ن شاعره و ضیالیلاردان اولان حمیده رئیس‌زاده ۱۹۵۲-جی ایلده اردبیل‌ده آنادان اولوب.

داها چوخ "ماویلر" و "یاشیل ماهنی" شعر کیتابلاری ایله تانینا گونئی‌لی شاعره‌نین بیر چوخ شعرلری فارس دیلینده ترجمه ائدیله‌رک دورو ادبی مطبوعات‌دا نشر ائدیلیب. او اثرلرینی «سحر» امضاسی ایله یازیر.

حاضردا تهران شهرین‌ده یاشایان شاعره گونئی آذربایجان و ایران‌دا اؤزونه‌مخصوص یارادیجی‌لیق اصلوبو ایله سئچیلیر.
آشاغی‌دا اونون ایکی شعرینی تقدیم ائدیریک:

دایانماغا دیوار،
نفس چکمه‌یه آز-چوخ هاوا،
آلیشدیرماغا سیگار،
سینه‌مین دردین بیتیرمه‌یه داوا
وار.
بونلار دئییل دردیم،
گونش یئرینه اولدوزلارا کیفایت ائلییه بیلردیم-
باشی‌می چیینیوه قویوب
آغلایا بیلسیدیم.

----

یئنه نیسگیل لچیین سالدی خزان
آچمامیش غنچه‌لری چالدی خزان
منی ده جایناغینا آلدی خزان
یاشیل احساس‌لی چمن ساخلا منه.

یالانا دوزلوک اوخو ائتسه اثر
گول بیتیب، غنچه گولوب، آچسا سحر
بیر ده گؤرکملی اورک گؤرسن اگر
او اورکلرده وطن ساخلا منه.

بیر دایان، زیروه‌یه دیز قوی، گلیرم
سانما کی خسته‌یه‌م ایز قوی، گلیرم
بیر چاناق سؤزده دنیز قوی، گلیرم
بیر دؤیوش میدانی چن ساخلا منه.

«اوجالیقلاردا ایزین وار» دئیه‌رک،
چیخارام داغلارا «یار-یار» دئیه‌رک.
گلره‌م غربت ائوین «دار» دئیه‌رک
وطن عنوان‌لی کفن ساخلا منه.