کولت. آذ خالق شاعری صابیر روستم خانلی نین "یارپاق یاغیشی" شعرینی تقدیم ائدیر:

یارپاق یاغیشینا
توتدوم کؤنلومو،
الندی باشیما قیزیل آنلاریم.
باهاردان پاییزا، اوزو گونشه
بیر کؤکون اوستونده قیزینانلاریم.
یاشیل سئوینجی ده، ساری غمی ده
تورپاق عونوانینا یازیلانلاریم.
زامان دا گئرییه دؤنموشدو سانکی
گونلریم کئچمیشه قانادلانمیشدی.
هر هانسی یارپاقدا اوزاق خاطره
جاوان بیر اومیددن قوپوب یانمیشدی.
هئییم قالمامیشدی آددیم آتماغا،
یارپاقلار عزیزیم، قوهوموم ، دوستوم.
بیری گئدنده ده گولروزلویدو،
بیریسی تزه‌تر، بیریسی یاشلی.
بیری اؤز عؤمرونو یئتیریب باشا...
بیرینی قوپاران نامرد کولک‌دی.
بیری قورودوغو سونونجو سؤزو
اوز سورتوب تورپاغا سؤیله‌یه‌جک‌دی...
بو یاغیش غریبه یاغیش‌دی، الله،
ایشلییر آدامین اوریینه‌جن!..
یویور دویغولاری، روحو دا یویور،
اتالت‌دن یویور، قورخودان یویور.
ائله بیل تؤکولور سؤزونون پاسی،
سیلیر آغریلاری باخیشلاریندان.
یوز بئله النه بونجا گوج اولماز
باهارین سئلله‌مه یاغیشلاریندا.
طبیعت آغلاییر آدامدان بئتر،
هئچ بئله قیرمیزی گؤز یاشی اولماز.
بیر چیلپاق آغاجدی اورتادا قالان
جانلی‌دی،
جانلی‌دان باشداشی اولماز!
چینیمه بیر یارپاق قونور آستاجا،
بلکه ده، عؤمرومون خریته سی‌دی.
بلکه ده، اؤزومدوم بوداقدان دوشه‌ن،
بیر دوغما اوره یین ایلک آرزوسویلا
ایسیدن اولسایدی دیریلسه یدیم.
بو مئشه یولوندا اؤز روحوم کیمی
چینیمه قونموشدو – کؤورک، کؤمکسیز.
گؤرونور تابوتا گیرمزدن اول
یارپاق تک گئدیریک چیینلرده بیز...