کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

چین ایپه ییندن اوز چکیلمیش یورغانا بوروندو، گناهکار گوزلرینی باجایا زیلله دی. ماوی گوزلو، قیرمیزی ساققال کیشی ائله بیل او هوندور تاوانداکی باجادان گورونن گویلردن آسیلمیش بیر وضعیتده اونا باخیردی. اما بو باخیشی قادینین گوزلری یوخ، ظریف اوریی، شیرین خیالی، بوتون وارلیغی دویوردو.

بلکه آلاچیقدا دوغرودان دا یاد کیشی واردی؟

سسینی چیخارمادی. اما هئچ بیر هنیرتی ده ائشیتمه دی. بلکه ایسته یینه چاتاندان سونرا سورونوب چیخیب، یاخود سسینی ایچینه آتیب؟ هر شئی اولا بیلردی. هم ده اولا بیلمزدی. چونکی آلاچیغین اطرافینداکی چادیرلاردا اونون قارداشلاری، قایینلاری یاشاییرلار. بوتون اطراف چوللرده کی طایفالارین هئچ بیرینده میثلی-برابر اولمایان بو گوزل لییی گوز ببکلری کیمی قورویورلار. بلکه ده اونون حسرتیندن یانان ائله بیر ایگید تاپیلیب کی، اولومونو گوزونه آلیب، هله نیتینه چاتمامیش دوغرانماغا، ایتلره یئم اولماغا راضی اولوب؟ بس اوندا ایتلر نییه هورمه ییب؟

فیکرینه گلدی کی، آلاچیقین کئشییینی چکن نوکری چاغیرسین. بو نوکر نئچه ایلدیر اونلارا صداقتله قوللوق ائدیر. اونون آتاسی قونشولوقداکی بایات ائلیندن اولان بیه لیک آدلی بیر کیشیدیر. بیر دفعه توماق خانین اوغلو ساققال بیر داغ کلی ووروب گتیرمیشدی. بو حیوان مقدس حساب اولونوردو و اونون اتیندن دادماق مقدس لییه قوووشماق حساب ائدیلیردی. اودور کی، بیه لیک اوغلونو داغ کلی نین اتی عوضینه توماق خانین اوغلو تولون ساققالا اوتورموشدو، او دا همین اوغلانی قوهومو اولان بو قادینا هدیی وئرمیشدی.
قادین یورغانی قورشاغینا چکیب دیکلدی. آلاچیغین قاپیسینا طرف بویلاندی، اما نوکری چاغیرمادی. بونون اوزو ده شبهه دوغورا بیلردی. قورخویا دوشدو. اولمایا گئجه اونون یاتاغینا گیرن نوکر اوزویموش؟

بو طایفانین چوخ سرت قانونلاری واردی. اری دوبون-بیان طایفا باشچیسی ایدی. ایگیدلیکده، جنگاورلیکده تایی-برابری اولمایان بیر جاواندی.
اونلاردان قوزئیده چین اولکه سی یئرلشیردی و قوجالارین دئدیییینه گوره اونلارین طایفالاری یاشادیغی یئردن هر طرفه او قدر بوش دوزنلر اوزانیردی کی، آیلارلا آت سورسن ده، آخیرینا چاتا بیلمزسن. واختیله بو یئرلرده چوخ قدرتلی دولتلر اولوب و اری کیمی ایشلک چینلیلر دوزنلری افقلرینده کی داغلارین زیروه لری ایله گون باتاندان گون دوغانا نئچه آیلیق آت منزیلی اولان قالا دیوارلاری تیکیب، اوزلرینی دشمندن قوروماق ایسته ییبلر. ایندی او قدرتلی دولتلر یوخدو و اونلارین یئرینده بیر-بیری ایله دشمنچیلیک ائدن آیری-آیری طایفالار چادیر قورموشلار.

آما هر دفعه دوبون-بیان اوز بالاجا بوی، اوزون توکلو آتینین یهرینه قالخاندا ایگیدلرینین ده بیر قیسمینی گوتوروب سفره چیخار، آیلاردان سونرا دوه کاروانلاری گتیرر، یوکلری بوشالداردی. بو صحرانین اورتاسیندا تجارت گئدردی. قونشو طایفالارا دا ایپک، خار، زرخارا، گوموش قابلار، نفیس چینی دولچالار ساتیلاردی. هئچ کس بو ایشده اونونلا بحثه گیره بیلمزدی...

داوامی وار..