میرجفر باغیروولا گؤروشون قورخوسونو هئچ واخت اونوتمایان، کفن پولونو سینه‌سین‌ده گزدیره‌ن آکتیور رضا افغان‌لی (جعفرزاده) ۱۸۹۹-جو ایلده جنوبی آذربایجانین سراب شهرین‌ده دوغولوب.

کولت. آذ خاتیرلادیر کی، "افقان‌لی" تخل‌لوسونو اونا خالق آرتیستی کاظیم ضیا وئریب. چونکی رضا سراب شهری یاخینلیغین‌داکی اووقان‌لی "افغان‌لی" کندین‌دن ایدی. ایکی یاشی اولان‌دا آتاسی روستم کیشی وفات ائدیب. ۹ یاشین‌دان وارلی قاپیلارددا نؤکرچی‌لیک ائدیب، قویون قوزو اوتاریب. ۱۳ یاشین‌دا باکییا گلیب، آغیر شرایط‌ده نفت معدنلرین‌ده چالیشیب. ۳۰-جو ایللرده ایران وطنداشلاری گئری قایتاریل‌سا دا، رضا افقان‌لی باکی‌دا قالیر. لاکین گئری دؤنمدیی و ایران وطنداشلیغین‌دان ایمتینا ائتمدیی اوچون حبس اولونور. حبسخانادا پنجره‌دن قارشی بینادا یاشایان بی قیزینی گؤرور. سونا آدلی خانیما وورولان رضا افقان‌لی آزاد ائدیلدیک‌دن سونرا اونونلا عائله قورور. اونلارین بو نیگاحدان قیزی دونیایا گلیر. رضا باکی، تیفلیس، آشقاباد، سومقاییت تئاترلارین‌دا آکتیور کیمی، سونرا ایسه باش رژیسور کیمی ایشله‌ییب. ۱۹۴۸-جی ایلده "شرقین سحری" تاماشاسین‌داکی فرهاد رولونا گؤره "ایستالین" مکافاتی آلیب. ۳۹ یاشین‌دا امکدار، ۴۴ یاشین‌دا خالق آرتیستی فخری آدلارینی آلیب. رضا افقان‌لی عینی تاماشادا بیر نئچه اوبرازی ائله جانلاندیریب کی، تاماشاچیلار یالنیز آفیشاداکی سیاهی‌دان همین اوبرازلاری اونون اوینادیغینی بیلیبلر.

گؤرکمی آکتیورون بیرینجی ائولی‌لیگی اوغورسوز اولدوغو اوچون تئاتر رسامی بدوره افقان‌لی ایله ائولنیر. لاکین بو ائولی‌لیک ده اوزون سورمور و رضا طاهیره آدلی خانیملا عائله قورور. رضا افقان‌لی "باکی‌لیلار"، "کندلیلر"، "او اولماسین بو اولسون"، "داغلاردا دؤیوش"، من کی، گؤزل دئییلدیم" و دیگر فیلملرده چکیلیب. "داغلاردا دؤیوش" فیلمینین لئریک‌ده چکیلیشی زامانی آکتیور چکیلیش مئیدانچاسین‌دان یوخا چیخیر. خئیلی آختاردیق‌دان سونرا اونو ایرانلا سرحدده، مفتیللرین یانین‌دا اوزو جنوبی آذربایجان طرفه دایاندیغی یئرده تاپیبلار. "کندلیلر فیلمین‌ده ایسه میرجفر باغیرووون پروتوتیپینی یارادیر. آکتیور ایر دفعه کوچه‌ده قارا آوتومبیلده ایلشن میرجعفرله راستلاشیر. باغیروو شهادت بارماغینی ائینیینین آراسینا سیخیب و آکتیورا دقتله باخیب. باغیروو کیمه‌سه بو جور باخیردیسا، همین آدام تئزلیکله حبس اولونوردو. گونلرله حبس اولوناجاغینی گؤزله‌سه ده، رضا افقانلینین آردینجا گلن اولماییب.

رضا افقان‌لی ارمنی آکتیور واقرام پاپازیانا نیفرت ائدیرمیش. چونکی پاپازیان گئتدیی بوتون سفرلردن فیریلداقلا بیرین‌دن اوزوک، بیرین‌دن آیاق قابی اوغورلایاراق آرادان چیخیرمیش. رضا افقان‌لی دا بون‌دان خبردار ایدی. بیر دفعه رضا افقان‌لی حمام‌دا بوینون‌دان آسدیغی قارا کیسه‌نی اونودور. همین کیسه‌نین ایچین‌ده ۱۰ مین روبل پول وار ایمیش. آکتیور همین مبلغی کفن پولو کیمی اوزرین‌ده ساخلاییرمیش. کیسه تاپیلاراق صنعتکارا تحویل وئریلیر. رضا افقان‌لی ۱۹۷۳- جو ایلده ۷۴ یاشین‌دا دونیاسینی دییشیب. آکتیورون قیزی اوفلییا آسلان دا آتاسینین صنعتینی داوام ائتدیریب.