اورمو گؤلونون قوروماسین‌دان ایللر سونرا باش وئره‌جک اکولوژی فلاکتدن بحث ائد‌ن بدیعی فیلمین حاضرلیقلارینا باشلانیلیب.

بو باره‌ده Kult.az-آ آچیقلاماسین‌دا تانینمیش گونئی‌لی رژیسور بابک شیرین صیفت معلومات وئریب.

او، فیلمه تورکییه، آذربایجان، عراق و ایران‌دان اولان یارادیجی هئیتین جلب اولوناجاغینی دقته چاتدیریب:

«گؤلون ناغیلی» آدلی فیلم آذربایجان دیلینده چکیله‌جک. خاریج‌دن دعوت ائتدییمیز شخصلر ایسه اؤز دیلین‌ده دانیشاجاق. حادثه‌لر بیر یازیچینین توی گونونده جریان ائدیر. اکران ایشینین چکیلیشلرینی گلن ایلین پاییزینا نظرده توتموشوق. آرتیق ایلکین مرحله باشا چاتیب. بعضی دئتاللار اوزرینده ایش گئدیر. فیلمین سناریسین‌ده یازیچی حافظ خیاوی و رژیسور بهرام توکلی ده یاخین‌دان اشتراک ائدیر. اوپراتور ایسه تورج آصلانی‌دیر».

رژیسور بدیعی فیلمین حاضرلیقلاری ایله یاناشی، سندلی فیلم اوزرین‌ده ده ایشلدیینی دئییب. بیلدیریب کی، مغان-ساوالان یایلاسین‌دا اتنو-میفولوژی ژانردا چکدیی سندلی فیلمین چکیلیشلرینین ۴۰ فایزی آرتیق تاماملانیب.

یارادیجی‌لیق پلانلاریندان دانیشان ب.شیرین صیفت فیلملرله یاناشی، کیتاب و سرگی حاضرلیقلاری ایله ده مشغول اولدوغونو دقته چاتدیریب.

«ایستر شمال، ایسترسه ده جنوبدان اولان ضیالیلاریمیز تورک آنتولوگییاسی و میفولوگییاسی ایله یاخین‌دان تانیش دئییل. متخصصلر استثنا اولماقلا، بو باره‌ده آز معلوماتلیدیرلار. یونان میفیندن ساعتلارلا دانیشا بیلرلر، اما چوخ آز آدام بیلیر کی، اولگه‌ن، یاخود کایرا خان کیمدیر. قرارا گلدیم کی، اورتا آسییادان باشلامیش آنادولویا قدر، میفولوژی قهره‌مانلاریمیز، ائل‌جه ده اورتاق اینانجلاریمیز حاقین‌دا بیر کیتاب حاضیرلاییم. تورک دیلین‌ده نسخه‌سی دئمک اولار کی، حاضردیر.

ایللوستراسییالار اوزرین‌ده ده چالیشیرام. چونکی تصویر آنلاییشی بیر ملت و خالق اوچون چوخ واجیب‌دیر. بیزیم قدیم کیتابلاردا بو تیپ تصویرلر اولوب. قایناقلاریم زنگین دئییل، اؤز تسوووروم‌ده اولانلار اساسین‌دا چکیرم. آرتیق ۴۰ اثر چکیلیب. سرگی، یاخود کیتاب شکلین‌ده تقدیم ائتمک فیکرینده‌یه‌م».