بیر چوخ ماهنیلاریمیز یارانان زامان یا معین سنزورالارا معروض قالیب، یا دا دییشدیریله‌رک ایندیکی فورماسینی آلیب.

Kult.az خبر وئریر کی، دییشیکلیک ائدیله‌ن، اما اساس فیکرین اؤتورولمه‌سین‌ده ماهیتینی قورویوب ساخلاماغی باجاران، بوتؤو آذربایجانا هدف‌لنه‌ن بئله ماهنیلاردان بیری ده "بورا وطن‌دیر" ماهنی‌سی‌دیر.

ماهنینین بسته‌کاری جوانشیر قولیئو، سؤزلری ایسه دیلسوز مصطفی‌یئوه عاییددیر.

ماهنینین یارانما تاریخچه‌سینه نظر سالاق...

یوسف مصطفی‌یئوین یمن تورکولریندن تأثیرلنه‌رک یازدیغی بورا وطن‌دیر شعیری ۷ بنددن عبارت ایدی. لاکین شعیرین ایکی بندی ماهنییا او زامان داخیل اولمور. چونکی همین بندلرده دربند و تبریز تصویر اولونوردو. بو ایسه سووئت ایدئولوگییاسینا ضد ایدی. اونا گؤره ده یالنیز سووئت آذربایجانینین شهرلری حاق‌دا اولان بندلر ماهنییا داخیل اولور.

ماهنینین بسته‌کاری جوانشیر قولیئو ماهنینین یارانماسی ایله باغلی دانیشارکن دئییر:

"او زامان، ۱۹۷۵-جی ایلده آچیق شکیل‌ده جنوبی آذربایجانا سئوگی اظهار ائلمک ممکن دئییلدی. بو قاداغان ایدی. بیز ایسه ایستییردیک کی، هانسیسا یوللا بونو ائدک. و دیلسوزلا چوخ گؤزل اصول تاپدیق:

بورا آرازدیر،
سویو دایازدیر
غمیم بوز توتور،
نئینیم آیازدیر،
لئیلیم آیازدیر.

یعنی سئوگی‌لی‌سینه قوووشا بیلمیر - چایین او طرفین‌ده... بئله بیر فیکیر وار اوردا. کئچدی، ایراد توتمادیلار. آنلامادیلار ماهنی‌داکی او سؤزلرین آرخاسینداکی درین فیکری. بو گونه قدر ده بئله گئدیر.

بستکار آیدین عزیز ماهنینین یارانماسینداکی پروبلملردن دانیشارکن جوانشیر قولیئو و دیلسوز مصطفی‌یئوین بو آددیمینین بوتون خالقیمیزین ایچ سسی اولدوغونو بیلدیریب:

"بو دیلسوزون و جوانشیرین بوتون آذربایجانلیلارین آرزوسونو دیله گتیرمک جهدی ایدی. حیات گؤستردی کی بو موتیو ایندی ده کئچمیش‌ده ده گله‌جکده ده اولاجاق".

شاعر دیل‌سوز مصطفی‌یئو ایسه ای تی وی-یه مصاحیبه‌سی زامانی ماهنینین سؤزلرین‌ده‌کی گنجه سؤزونون ده سنزورایا قالما ریسکی اولدوغونو بیلدیریب.

"منیم اوردا تبریز و دربند بندلریندن داها چوخ نیگارانچیلیغیم گنجه ایله باغلی ایدی. چونکی او واخت کیرووابادا گنجه دئیه‌نلره یاخشی باخمیردیلار. اما خوشبختلیکدن خطا سوووشدو، او مسئله‌یه هئچ توخونمادیلار. گنجه اولدوغو کیمی قالدی".

بئله‌لیکله، بیزیم بو گونه قدر سئوه‌رک دینلدییمیز، وطنپرورلیک دویغولاریمیزین تظاهر ائلدیی "بورا وطن‌دیر" ماهنی‌سی یارانیر، او تایلی بو تایلی آذربایجانا خیطاب ائدیر.