Kult.az فیلولوگییا علملری دوکتورو، پروفسور، امکدار علم خادیمی نیظامالدین شمسیزادنین یازیسینی تقدیم ائدیر.
باخدیقجا حسنونه دویماییر گؤزوم
تبریزیم، تبریزیم، گؤزل تبریزیم.
...قویمارام یادلاری گیرسین قوینونا،
ایزن وئر قولومو سالیم بوینونا.
سلیمان روستم
یئنه تبریزین قاشلاری چاتیلیب. ۲۰۰ ایلدیر کی، تبریز آزادلیغا حامیلهدیر. تاریخ تورکون خئیرینه ایشلییر. تورک تاریخینین تکری تبریزده فیرلانیر. بو گون تبریزده آخیدیلان صاف و قدرتلی تورک قانی تاریخده سئله دؤنوب، فارس شووینیزمینی بوغاجاق. بونو بیز دئمیریک، تاریخ اؤزو دئییر. تاریخ ان عدالتلی حاکمدیر.
تبریزین باشی همیشه بلالار چکیب. ۱۳۸۷-۱۳۹۷-جی ایللر عرضینده تبریز یئرلی حاکملر طرفیندن ۱۴ دفعه هوجوما معروض قالیب، بیر حاکمین الیندن دیگرینه کئچیب، ۱۳۹۲-جی ایلده امیر تیمور گلیب تبریزی فتح ائدیب. تبریز اولجه آغقویونلولارین، سونرا صفوی ایمپرییاسینین پایتختی اولوب.
"همدان حدینین ایبتیداسیندان تا زنجانا و ابهره و آخیری دربندی خزره چیخینجا بونا آذربایجان دئییلیر". (ابو جعفر محمد ابن جریت تبری). تبریز بو آذربایجانین - بوتؤو آذربایجانین پایتاختیدیر.
بو گوندک - ۲۰۰ ایلدیر کی، آذربایجانین وطنکش موناورلری ۱۸۰۶-جی ایل کورکچای، ۱۸۱۳-جو ایل گلستان، ۱۸۲۸-جی ایل تورکمنچای تاریخی سهولرینی دوزلتمهیه چالیشیر. بو ایللر عرضینده آذربایجان هئچ بیر آذربایجان تورکونون اوریینده بؤلونمهییب، همیشه بوتؤو یاشاییب.
نهایت، ۲۰۲۰-جی ایلده، آذربایجانین ۴۴ گونلوک وطن محاربهسینده قازانیلمیش ظفردن سونرا اؤز کیملیینی درک ائدن، آزادلیغین خوشلا آلینمادیغینی گؤرهن خالقیمیز آیاغا قالخیب، اؤز تاریخی حاقینی طلب ائدیر.
۲۰-جی عصرین "ملا نصرالدین"چی شاعری - میللی یازاریمیز علیقولو غمگسار
بیر اوزوم قارادیر، بیر اوزوم ساری
فلک ده گؤتورمز بو عذابلاری
- دئیه فریاد ائدیردی. منیم دوستوم، خالق شاعری نریمان حسنزاده ایسه "خاریبولبول" پویماسیندا یازیر:
پیوطرون وصیتی
هله ایندی اوزه چیخیر.
یوللار گئدیب ایستانبولا
اوردان دا تبریزه چیخیر.
شاه وئرمیشدی
ناخچیوانی، قاراباغی،
روسون قصدی تبریزیدی.
خالقیمیز تاریخ بویو تبریز حسرتینی بایاتیسیندا، داستانیندا یاشادیب:
آغ دوه دوزده قالدی،
یوکو تبریزده قالدی.
اوغلانی قان آپاردی،
درمانی قیزدا قالدی.
خالق شاعری، رحمتلیک دوستوم سهراب طاهیر "ایکی بؤلونمکدن ائله قورخموشام، چؤپو ده ایکییه بؤله بیلمیرم" دئییردی. ایستعدادلی شاعر ایوب سعدی ۸۰-جی ایللرده بیر دفعه ایچکی اوستونده دولوخسوناراق منه بیر حسرت شعری سؤیلهدی. یادیمدا بو میصراعلار قالیب:
آرخایا باخیرام،
آرخادا وطن،
قارشییا باخیرام -
قارشی وطندیر.
کؤنلومون کؤینهیهن
باشی وطندیر.
ایکی عصره یاخیندیر پویزییامیز بو کؤنول گؤینرتیسی ایله یاشاییر.
بو بایاتیلار دا شاعرلیک ادعاسیندا اولمایان منه مخصوصدور:
غیرتیمین اؤلچوسو
خودآفرین کؤرپوسو،
بیرلشدیر ساغی، سولو،
آچیلسین وطن یولو.
بو سؤز منه آر دئییل،
آراز گناهکار دئییل.
بیز زورلا آیریلمیشیق
آراز سببکار دئییل.
آراز، آراز خان آراز،
قانی آخان آراز.
سرحد مفتیللریندن
حسرتله باخان آراز.
("توران یولو" شعیرلر کیتابی ۲۰۲۱، س.۱۰۴)
آذربایجان "اینفارکت" کئچیرمیش اوریه بنزییر، تاریخین عدالتسیز ضربهلریندن پارچا-پارچادیر. اونون علاجی میللتین بیرلیگیدیر. منیم "آذربایجانچیلیق" (باکی، ۲۰۰۶ سه.۱۰۴) کیتابیم بو سطیرلرله باشلاییر.
هله ۲۱-جی عصرده ده بو پروبلم اؤز حلینی گؤزلییر. ایران اراضیسینه زورلا قاتیلمیش ۳۵ میلیون آذربایجان وطنداشی "آزادلیق وئریلمیر، آلینیر" حقیقتینی باشا دوشوب، یومروق کیمی بیرلشیب.
ایندی ده ان بویوک آذربایجان دردلیسی محمدحسین شهریاری دینلیک:
کؤنلوم قوشو قاناد چالماز
سنسیز بیر آن، آذربایجان،
یا رب، ندیر بو قدر
اورکلری قان ائتمیین،
قولو باغلی قالاجاقدیر
نه واختاجان آذربایجان؟
ایگیدلرین ایران اوچون شهید اولوب،
عوضینده درد آلمیسان، غم آلمیسان
سن ایراندان، آذربایجان!
اؤولادلارین نه واختادک ترک وطن اولاجاق؟
ال-اله وئر عصیان ائیله،
اویان-اویان، آذربایجان!
بسدی فراق آدلاریندان
کول الندی باشیمیزا
دور آیاغا، یا آزاد اول،
یا تمام یان، آذربایجان!
بؤیوک آزادلیق مجاهدی رسولزاده "آذربایجان قایهسی" ایله مباریزه میدانینا آتیلمیشدی. ۱۹۲۰-جی ایلده بو نجیب قایه "قیرمیزی قارانلیقلار"دا (علیبی حسینزاده) قرق اولدو. بوتون ایمپئرییالار کیمی روس-بولشئویک دؤولتی اولان اس.اس.ار.ای ده، اؤز توتالیتار ایدئولوگییاسی ایله بیرلیکده بیابیرچیلیقلا سقوط ائتدی. فقط بیزه - تورک قومونه تورپاق-اراضی ایتکیسی، ۲۰ یانوار و خوجالی سویقیریملارینی میراث قویدو. بو گون ده رزیل و قدار دوشمهنه هدییه و پای وئریلمیش گؤیچه، زنگزور، چوخور سعد (ایروان) تورپاقلاری فریاد ائدیر، بیزدن امداد ایستییر.
نه زامان ابو جعفر طبرینین یوزیللر اؤنجه خریطهسینی نقش ائتدیی بؤیوک آذربایجانی - دربنددن همدانا، گؤیچهدن زنجانا، بورچالیدان کنکر کؤرفزینه، باکیدان تبریزه قدر اوزانان بوتؤو آذربایجانی گؤرجییک. یئنهدهمی بیزدن سونرا گلنلره تبریز حسرتینی، شهریار نیسگیلینی آجی بیر یادیگار قویاجاغیق؟ او زامان نه اجدادلاریمیز، نه نوهلریمیز، نه ده تاریخ بیزی باغیشلامایاجاق. تاریخین حکمو عدالتلی و آمانسیز اولور. بیز تاریخدن (و دوشمنلریمیزدن!) حاق ائتدییمیزی، بیزیم اولانی طلب ائدیریک. یوخسا سؤزوموزون گوجو ایله سلاحیمیزین قدرتی بیزی بیر میللت اولاراق بیرلشدیرهجک: "بسدی فراق اودلاریندان کول الندی باشیمیزا" (م.شهریار). بیزی هدهلهیهن، حیله تورو قوران دوشمنلریمیز اونوتماسین کی، بیزیم آرخامیزدا دونیادا ۴۰ آدلا یاشایان تورک میللتی دایانیر. او بیرلشسه، دونیانین منظرهسی تمامن دییشهجک. "بوتون دونیا تورکلری، بیرلشین!" - بیزیم شعاریمیز بو، گئتدییمیز عنوان توراندیر.
بابالاریمیزین آلتایدا، سیبیرده قالان تورپاقلاری بیزی - تورک اینتیباهینین مسافیرلرینی گؤزلییر. بیز کیچیک وطنیمیزی - شمالی آذربایجانی مردار ارمنی ایشغالیندان آزاد ائتدیک.
آنجاق بؤیوک وطنیمیز توران بیزی حسرتله گؤزلییر. هله اؤتن یوزیللیین اؤنلرینده - ۱۹۱۱-جی ایلده بؤیوک تورکچو - تورانچی ضیا گؤیالپ یازاردی.
وطن نه تورکییهدیر تورکلره، نه ترکستان،
وطن بؤیوک و معبد بیر اؤلکهدیر: توران!
توران موجرد بیر آنلاییش، اراضی دئییل. دده قورقوددو، "ماناس"دی، نظامی، ابن سینادی، ال بیرونیدی، فرابیدی، نسیمیدی، نواییدی، فضولیدی - ۴۴ گونده ۳۰ ایللیک ایشغالا جان قویان شهیدلر، قاضیلردی. تورکون تاریخی گؤزوموزون قارشیسیندا یئنیدن یارانیر. توران شهید قانی ایله سوواریلمیش تورپاقدیر. بیز جان اکیب، قان تؤکوب آزادلیق بیتیریریک.
وطنیمیز تاریخین و تالعین الی ایله پارالانیب-یارالانیب، یارالاریندان قان سیزیر. بیز قهرمان آذربایجان اوغوللاری مدریک لیدرین آرخاسینجا گئدهرک تاریخین و تالعین یانلیش و آمانسیز حکمونو دییشملیگیک. تاریخی شانسی ایتیرمک اولماز. بوتون بو دویغولار سنین شانینهدیر، قهرمان تبریزیم! قالخ آیاغا، ظالما حدینی گؤستر، مرد اوغوللارین تاریخه میدان اوخویور. بسدی، ایران آدلانان مملکتده، فارسین حکمونه بویون ایمه.
تورکون قوللارینی باغلایان ایستیبداد زنجیرلری بو گون تبریزده پارام-پارچا اولمالیدیر. یوخسا ستار خانین، اولو شهریارین نیگاران روحلاری بیزی باغیشلاماز.
آذربایجانی آتا مالی کیمی ایکییه بؤلوب راحت یاشایانلار بو گون چالخالانیر، تاریخ بو ایمپرییالارین یاخاسیندان توتوب سیلکلییر، عدالت طلب ائدیر.
اوزون ایللر مقدس دینیمیزدن سوء-ایستیفاده ائدیب ایرتیجایا، موهوماتا، خرافاتا چئویرهن ایران ملاا رژیمی تاریخین گیردابینا یووارلانماقدادیر. بو گون دونیانین باغلاری روسییادا و ایراندا قیریلیب، اونلارین پوچ ایدئولوگییاسی جان وئرمکدهدیر. تورکون تورپاقلارینی ایشغال ائدیب اؤزلرینه وطن دوزلدن بو دؤولتلره تاریخ اؤز آمانسیز حکمونو وئریب، گئرییه، ایستیثمارا، استبدادا یول یوخدور. تاریخین تکرینی دؤندرمک اولماز، تبریزیم!
