تورکییه‌ده باش وئرن زلزله باره‌سین‌ده چوخلو میفلر یازیرلار. گویا بو زلزله تکتونیک سلاحلا و آمریکا و یا روسییا طرفین‌دن ائدیلیب؛ گویا بو سلاحین یارادیجیسی آذربایجان‌لی اکرام کریموودو - اس.اس.ار.ای دؤورونده مخفی لابوراتورییادا بونو ایجاد ائدیب، سونرا گویا آمریکانین گیزلی کشفیات اورگانلارین‌دان گیزله‌نمک اوچون آفریکایا قاچیب…

Kult.az خبر وئریر کی، بو سؤزلری تاریخچی عالیم زائور علیئو تورکییه‌ده‌کی دهشتلی زلزله اطرافین‌دا یاییلان ادعالاری شرح ائدرکه‌ن دئییب.

او بیلدیریب کی، واختیله بئله ادعالارا اینانیب، اما خاریجده معین قوروملاردا آراشدیرمالاردان سونرا نه قدر یانیلدیغینی آنلاییب:

«دوغرودور، اکرام کریموو بؤیوک عالیم، نفوذلو اینساندیر. زلزله اوزره متخصصدیر. سووتلر دؤورونده ده گیزلی لابوراتورییادا چالیشیب. اما سلاح ایجاد ائتمک دئییل، ساده‌جه، زلزله‌لردن اؤنجه یوکسک تئزلیکلرده باش وئرن آنورمال دییشیکلیکلره دقت یئتیرمک اوچون. اوللر بو جور زلزله خبردارلیقلارینی یالنیز خصوصی رقمسال آپاراتلارین کمکی ایله معین ائتمک اولوردو. اما کریمووون تدقیقات قروپو یئنی علمی مئتودلا، آدیچکیلن جیهازلارا احتیاج اولمادان، زلزله علامتلرینی هله نووه‌سین‌ده ایکن معین ائتمیی باجاریر. والسلام. نه سلاح ایجادی باره‌ده معلوماتلار، نه ده بو سلاحی ایشه سالاجاق انرژی سووئتلرده و ایندی روسییادا وار».

عالیم خاطرلادیب کی، او زامان سووئت کشفیاتی آمریکا و غرب دؤولتلرینه گویا گیزلین اینفورماسییا سیزدیریر: «۱۹۶۸-جی ایلده اس.اس.ار.ای مدافعه ناظرلیگی «مئرکوری-۱۸" مخفی پروگرامی چرچیوه‌سین‌ده (کود: نیر № ۲م ۰۸۶۱۴ پم) گیزلی عملیاتا باشلاییر. هدف تام مخفی‌دیر - زلزله تؤره‌دن کوتلوی قیرغین سلاحینی یارادیب آمریکانی محو ائتمک ایستییر».

بو دزینفورماسییا او قدر سرعتله یاییلیر کی، آمریکا کشفیاتی درحال ایشه کئچیر. سووتلرین بوتون مرکزلرینه آگنتلر سیزدیریلیر و بیشککده اولان لابوراتورییایا گلیب چیخیرلار. نتیجه‌ده آمریکالیلار حقیقتی اوزه چیخاریرلار. بو سووت کشفیاتینین بلفی‌دیر، بئله سلاح باره‌ده بیر چئرتیوژ بئله یوخدور. درحال سووئتلر ایزی آزدیرماق اوچون اکرام کریمووون علمی تدقیقات گروپونو باغلاییر. سووئتلر بیابیر اولدوقلارینی باشا دوشوب بئله معلوماتی یاییرلار: «دونیانین مختلیف بؤلگه‌لرینه سپه‌لنه‌ن روس کشفیاتینداکی سیزمادان سونرا کریمووون ائوینه باسقین ائد‌ن آمریکا کشفیاتی بوتون تدقیقاتلارین صورتینی اوغورلاماغا نایل اولور. بو حادثه‌دن سونرا کریموو اؤز گروپ عضولرینی آنجاق جنوبی آفریکا رسپوبلیکاسین‌دا تهلوکه‌سیز یاشایاجاغینا دایر تأمینات آلیر. آمریکالیلار ایسه اوغورلادیقلاری آراشدیرمالار اساسین‌دا ۱۹۹۰-جی ایللرده، آلیاسکادا هارپ سیسمیک ایستانسییاسینی قوروب اوردان طبیعی ایقلیمه مداخیله‌لره باشلادیلار».

عالیم بو ادعالارین غیری-جدی اولدوغونو بیلدیریب:

«حاضردا اکرام کریموو آذربایجان میللی علملر آکادمییاسی ریاست هئیتی نزدینده سیسمولوگییا علمی مرکزینین دیرکتورو، فیزیکا-ریاضیات علملری دوکتورو، پروفسوردور. اکرام معلم اگر بئله سلاحین مؤلفیدیرسه، حاضردا دونیانین ان گوجلو دؤولتلری اونو چوخدان دعوت ائدیب میلیونلارلا پول خرجله‌ییب، بو سلاحا صاحب اولاردیلار. بئله سلاح باره‌ده میف دوغرو اولسا ایدی، اکرام معلم ایندی آکادمیادان آیدا ۹۰۰ مانات یوخ، آمریکا مودافعه ناظیرلیین‌دن ایلینه ۹ میلیون دلار معاش آلاردی.

بس تکتونیک سلاح ندیر؟

تکتونیک سلاح دونیانین گئولوژی قورولوشونا مداخیله ائد‌رک معین بیر بؤلگه‌ده زلزله، وولکان و بو کیمی طبیعی فلاکتلر یارادا بیله‌ن مودرن سلاح نؤوودور. بو سلاح ایلک دفعه ۱۹۹۲-جی ایلده آلکسی نیکولایو طرفین‌دن ایدئیا اولاراق سسلندیریلیب. نه ایرام کریموو، نه ده آمریکانین عالیملری کشف ائدیب. روس عالیمی بئله ایدئیا ایر‌لی سوروب کی، دونیانین درین قاتلاریندا ییغیلمیش انرژینی سیسمیک دالغالارلا یؤنلندیره‌رک، گوجلو زلزله‌لر یاراتماق ممکن اولا بیلر. اما بونون اوچون یئر اوزونده او دالغالارا تأثیر ائد‌جک انرژی مؤوجود دئییل. حتی نووه رئاکتورو بئله بو انرژینی وئره‌جک گوجده دئییل. یئرین داخیلینده اولان ییغیلمیش انرژیلری یؤنلتمک اوچون اولدوقجا بؤیوک انرژی لازیمدیر. حاضردا دونیادا بئله انرژی وئره‌جک گوج یوخدور. علمین پیغمبری نیکولا تسلا بئله انرژینی یاراتماق و دونیانی پولسوز و فاصیله‌سیز الکتریک ایله تعمین ائتمک اوچون لاییحه اوزرینده ایشله‌سه ده، روتشیلد عائله‌سی، روکفکلر عائله‌سی و دیگرلری اونا مانع اولدولار. او گوندن بری دونیادا فیزیکا ایله مشغول اولان ان دیرلی عالیملره محاربه اعلان ائدیلدی. ۱۹۴۰-جی ایلده‌ن بو گونه قدر بؤیوک علمی ایشلر آپاران یوزلرله فیزیک محو ائدیلیب.

آمریکالیلار ایسه ۲۰۰۰-جی ایلین اووه‌لرین‌ده تکتونیک سلاح اولان هارپ یاراتدیقلارینی اعلان ائتسه‌لر ده، اونون گوجو چوخ ضعیفدیر. بو باره‌ده جدی سندلر اوخوموشام. بئله سلاح وار. اما او، ریشتر جدولی اوزره ماکسیموم ۳ بال گوجونده سیلکه‌له‌نمه یارادا بیلر. اما اوزاق مسافه‌لرده یوخ».