بو گون آذربایجان تاریخی، اؤزللیکله آذربایجانلیلارا قارشی تؤره‌دیله‌ن سویقیریملار و ایروان تاریخی ایله باغلی یازدیغی اثرلری ایله تانینان تاریخچی عالیم صمد سرداری‌نیانین آنیم گونودور.

Kult.az خبر وئریر کی، او، ۱۹۴۷-جی ایل مایین ۱۱-دا تبریزین امیرخیز محله‌سین‌ده آنادان اولوب.

سردارینییا غربی آذربایجان ایالتینین سالماس شهرین‌ده ۲ ایل حربی خیدمت‌ده اولدوق‌دان سونرا میللی رادیوتلویزییا تشکیلاتیندا ایشه قبول اولور و تهرانا کؤچور.

تهرانا کؤچدوک‌دن سونرا یئنی‌دن تحصیل هوه‌سینه دوشور. تبریز اونیورسیتتین‌ده تاریخ اوزره تحصیل آلان سردارینییا بو دفعه تهران‌دا میللی اونیورسیتت‌ده (اوخو: ایندیکی بهشتی اونیورسیتتی) حقوق ایختیصاصی اوزره تحصیل آلماغا باشلاییر. ۱۹۷۹-جو ایلده ده بورانی بیتیره‌رک دیپلم آلیر.

۱۹۷۹-جو ایل ایران انقلابین‌دان سونرا، پروفسور حمید نطقی، محمدعلی فرزانه، کریم مشروطه‌چی (سؤنمز)، منظوری خامنه‌ای، غلامحسین بگدلی، حسن مجیدزاده ساوالان و جواد هئیت ایله بیرلیک‌ه تهران‌دا "وارلیق" ژورنالینین نشرین‌ده اشتراک ائدیب.

صمد سردارینییا تهران‌دا ۱۰ ایلده‌ن بیر قدر آز یاشاییر و ۱۹۸۲-جی ایلده یئنی‌دن تبریزه کؤچور. عمرونون سونونادک تبریزده یاشایان صمد سردارینییا پئشه‌کار تدقیقاتچی و ژورنالیست کیمی یئرلی مئدیادا مقاله‌لر یازیب.

او، گونئی آذربایجان‌دا تاریخیمیزه یئنی باخیش تقدیم ائد‌ن، اونو تحریفلردن، قرضلردن تمیزله‌ییب علمی تمل اوزرینده قورماغا چالیشان تاریخچیلر نسلینین گؤرکملی نماینده‌سی اولوب.

آراشدیرمالاریندا دایم آذربایجانی بوتؤو اولاراق گؤتوروب. بونا گؤره اونون اثرلری قوزی‌ده ده دقتله ایزلنیلیر و لاییقینجه قیمتلندیریلیب. تاریخچی ۲۰۰۲-جی ایلده باکی‌دا آذربایجان اونیورسیتتینین "فخری دوکتورو" آدینا لاییق گؤرولوب.

۲۰۰۶-جی ایلده عالیمین "آرازین هر ایکی تاییندا مسلمانلارین سویقیریمی" آدلی کیتابی آکادمیانین شرق شناس‌لیق اینستیتوتو علمی شوراسینین قراری ایله "علم" نشریاتی طرفین‌دن نشر ائدیلیب. بو کیتاب‌دا ارمهنی قولدور دسته‌لرینین روس و اینگیلیس حربی قوه‌لرینین کمکینه آرخالاناراق تورکییه، ایران و آذربایجان اراضیلرینده چوخسایلی جینایت تؤرتمه‌لری، مسلمان کند و شهرلرینی خارابایا چئویرمه‌لری، یوز مینلرله گناهسیز اینسانلارین قتلعامینی تشکیل ائتمه‌لری توتارلی سندلر و منبع‌لر اساسیندا آچیلیب گؤستریلیر.

تاریخچینین دیرلی کیتابلارین‌دان دیگری ایسه "ایروان مسلمان ساکینلی ویلایت اولموشدور" کیتابیدیر. اثر تاریخی فاکتلاری اورتایا قویماق، ارمنی و اونلارا هاوادارلیق ائد‌ن اؤلکه‌لرین سیاستچیلرینین، تاریخچی عالیملرینین یالان و اویدورمالارینی ایفشا ائتمک مقصدی ایله قلمه آلینیب.

مؤلف کیتابا یازدیغی مقدمه‌ده قید ائدیر کی، ایران - روسییا محاربه‌لریندن، خصوصیله ده تورکمنچای مقاویله‌سیندن سونرا ارمنیلرین چوخورسعد ویلایتینه و اونون مرکزی ایروانا کؤچورولمه‌سینه روسلارین بیرباشا حیمایه‌دارلیق ائتمه‌لرینه و "مشقتلر گؤرموش میللته" هر جور دستک وئرمه‌لرینه باخمایاراق، ۱۹۱۸-جی ایله قدر ارمنیلر قفقازین هئچ بیر منطقه‌سینده اهالینین اکثریتینی تشکیل ائتمه‌ییبلر. یئری گلمیشکن، عالیم تاریخی فاکتلاری سسلندیررکن ارمنی مؤلفلرینه ده ایستیناد ائدیب. کیتاب ایروانین ایلکین یاشاییش مسکه‌نی کیمی فورمالاشماسی مرحله‌سیندن باشلایاراق بورادا یاشایان مسلمانلارین (آذربایجانلیلارین) داشناکلارین الی ایله کوتلوی شکیلده قتله یئتیریلمه‌سینه قدرکی بؤیوک تاریخی مرحله‌نی احاطه ائدیر. کیتابین ایلک حیصه‌لرینده مؤلف تاریخی سندلر و فوتولار اساسیندا روس ایشغالی عرفه‌سین‌ده ایروانین تاریخی-جغرافی منظره‌سینی، شهرین تورک-مسلمان معمارلیغی اساسیندا یارادیلمیش معمارلیق قورولوشونو، مدنیت عابده‌لرینین، دینی مرکزلرین (یئددی مسجیدین)، کاروانسارالارین و دیگر اجتماعی موسسه و تشکیلاتلارین شکلینی اوخوجویا تقدیم ائتمکله اونون تاریخی بیر مسلمان-تورک شهری اولدوغونو ثبوت ائتمه‌یه نایل اولوب.

بوندان علاوه عالیمین یارادیجیلیق فوندوندا "آذربایجان مشروطه دؤنه‌مین‌ده"، "آذربایجانین مشهورلاری"، "تبریز – بیرینجیلر شهری"، "تبریز – ایران‌دا چاپ صنعتینین بئشیی"، "ملا نصرالدین تبریزده"، "مشروطه دؤنه‌مینده آذربایجان قزئتلری"، «تبریز تنبکی عصیانی ایللرینده»، «علی موسیو»، «آذربایجان تئاترینین تاریخی»، «باغیر خان سالاری-میللی»، "قاراباغ محاربه‌سی"، "قاراباغ تاریخین گئدیشین‌ده"، "استقلال قهرمانی ثقه الاسلام" کیمی یوکسک اهمیتلی اثرلر ده یئر آلیر.

تبریزلی عالیم ۲۰۰۸-جی ایل آپرل آیینین ۱۱-ده ۶۱ یاشیندا دونیاسینی دییشیب.