آذربایجان خالق یارادیجیلیغینین بیر چوخ ساحه‌لرینده - آشیق موسیقی یارادیجیلیغی، آشیق پویزییاسی، ائلجه ده مغام صنعتینده شیکسته‌لرین خصوصی یئری واردیر.

Kult.az خبر وئریر کی، شیکسته-آغی، شیکسته-بایاتی، آشیق شیکسته‌لری، شیکسته -ضربی-مغاملار و مغام شعبه‌سی – شیکسته فارس، حتی، شیکسته-مقام خالق یارادیجیلیغینداکی شیکسته‌لره وئریلن اؤنمین اورتایا قویدوغو اینجه‌صنعت نمونه‌لریدیر. شیکسته ژانری اول آشیق موسیقی یارادیجیلیغیندا عمله گلیب و اونون مختلیف نؤولری یارانیب.

شیکسته‌لرین مزمون، اوبراز، اوقات، بدیعی تأثیر دایره‌سی خالقیمیزین معنوی عالمینه، حسلر دونیاسینا چوخ یاخین و دوغمادیر. بو موسیقی اؤزللیکلری شیکسته‌لرین گنیش یاییلماسینا و سئویلمه‌سینه، نسیلدن-نسله کئچه‌رک بو گونوموزه گلیب چاتماسینا اساس زمین اولوب. بو ائل هاوالاری خالقین شاد گونلرینده اونلارا یوکسک زؤوق و سئوینج حسلری بخش ائدیب، غملی واختلاریندا ایسه سانکی کدری، آغرینی اوووندورماغا، سویوتماغا قادیر اولوب.

قاراباغ شیکسته‌سی آذربایجان خواننده‌لیک صنعتینده شیکسته‌نین ایکی نؤووندن بیریدیر و ۱۹-جو عصرده ضربی مغام کیمی اؤزونده گنیش تشکل تاپیب.

آذربایجان ایفاچیلیق صنعتینین ان قدرتلی صنعتکارلاری - حاجی هوسو، جبار قاریاغدی اوغلو، او جمله‌دن، کئچه‌چی اوغلو محمد، زابل قاسیم، مشهدی محمد فرضعلیئو، سید شوشینسکی، خان شوشینسکی و بیر چوخلاری «قاراباغ شیکسته‌سی»نی بؤیوک مهارت و شوقله اوخویوبلار.

۲۰-جی یوزیل‌لیک‌ده و چاغداش دؤوروموزده یاشاییب-یارادان خواننده‌لریمیز ده شیکسته‌لرین ماهیر ایفاچیلاری کیمی مشهورلاشیبلار.

شیکسته‌نین قاراباغ و کسمه شیکسته‌سی نؤولری خواننده‌لریمیز طرفین‌دن تئز-تئز اوخونور. هر ایکی شیکسته ده سئوگی، محبتین دوغوردوغو حسلردن شیکایت، عذاب-اذیت، اضطراب وار. محض بو خصوصیتینه گؤره اونلارین موسیقی‌سینده هزینلیک وار. قاراباغ شیکسته‌سینین سؤزلری عنعنه‌یه گؤره خالقدان آلینیب، متنینی ایسه بایاتیلار تشکیل ائدیر.

عزیزینه‌م، قاراباغ،
شکی، شیروان قاراباغ.
عالم جننته دؤنسه،
یاددان چیخماز قاراباغ!