آپرلین ۲۷-ده آذربایجان دیلینده اولان "مالی چوخ، گونو قارا" تاماشاسی تبریزین ۲۲ بهمن کینوکومپلکسینین سیامی زالیندا نماییش اولوناجاق.

Kult.az خبر وئریر کی، بو باره‌ده تاماشانین رژیسورو یعقوب صدیق جمال معلومات وئریب.

رژیسسور، تبریزین "سرخه‌ای" ساراییندا بیر گروپ صنعت‌چی، هوسکار و مئدیا منصوبلارینین اشتراکی ایله «مالی چوخ، گونو قارا» کمدییا تاماشاسینین آفیشاسینین آچیلیش مراسیمینده چیخیش ائدیب.

او، صمد بهرنگینین اثری اساسیندا حاضرلانان "بالاجا قارا بالیق" تاماشاسینین مالییه پروبلملری و باشقا محدودیتلر سببیندن صحنه‌دن ییغیشدیریلدیغینی سؤیله‌یه‌رک، تبریزده صنعت آداملارینین آغیر دوروموندان گیلئیلنیب.

"سون نفسلریمیزی چکیریک. صنعتیمیزی آغیر دورومدان قورتارماق اوچون کیمین الیندن بیر ایش گلیرسه، آددیم آتسین. بونو اؤزومه گؤره دئمیرم، بؤیوک صنعت آداملارینین آغیر وضعیتینی نظره آلاراق یاردیما چاغیریرام. صنعت آداملاری یا کؤچوبلر، یا دا کؤچمک عرفه‌سینددیرلر"،- او بیلدیریب.

قید ائدک کی، "مالی چوخ، گونو قارا" تاماشاسی آذربایجان فولکلور حکایه‌لری اساسیندا حاضیرلانیب.