بو گون ۱۹-جو عصرین سونلاری، ۲۰-جی عصرین اوللرینده گونئی آذربایجاندا اؤزونه‌مخصوص ادبی اسلوبو ایله سئچیله‌ن آذربایجانلی شاعر حاجی رضا صراف تبریزینین آنیم گونودور.

Kult.az خبر وئریر کی، او، ۱۸۵۴-جو ایلده تبریزین تاریخی راستاکوچه (دیکباشی) محله‌سینین حصار کوچه‌سینده آنادان اولوب.

شاعر ارکه‌ن یاشلاریندان ادبی یارادیجیلیغا باشلاییب. اونون بوتون شعر و غزللری سؤزلرینین ساده و محکم‌لیگی، حسلرینده هیجان و صمیمی محبتین سونسوزلوغو ایله سئچیلیب.

۲۰ یاشیندا اؤز ائوینده تشکیل ائتدیی "صفا" ادبی یغینجاغینین اؤنجول شاعرلریندن اولان ادیبین یارادیجیلیغینین اساسینی غزل و مرثیه تیپلی نظم اثرلری تشکیل ائدیب.

حاجی رضا صراف تبریزی بو ساحه‌ده اورتایا قویدوغو اثرلرین گوجونه گؤره ۱۹-جو عصرین سونو، ۲۰-جی عصرین اوللرینده ایراندا یاشاییب یارادان تورک‌دیللی شاعرلر آراسیندا خصوصی یئری اولوب.

استاد شهریار صراف باره‌ده ائتدیی چیخیشیندا اونو تورک دیلینین خصوصی استعدادلی نماینده‌لریندن بیری کیمی دیرلندیریب.

شهریار «یانسین دیلیم آغزیمدا دئسه‌م نازینی آز ائت" آدلی قزلینی صرافین "دیلیم یانسین اگر دیلدن دئیه‌نی گل ترکی-ناز ائیله" مصراع‌سی ایله باشلایان غزلیندن تأثیرلنه‌رک یازیب.

آذربایجانین ۲۰-جی عصرده ان بؤیوک غزل استاسی علی‌آغا واحد صرافدان تاثیرلندیینی قید ائد‌رک، اونون یارادیجیلیغینی یوکسک قیمتلندیریب.

او، ۳۰ آپرل ۱۹۰۷-جی ایلده تبریزده آسما خسته‌لییندن دنیاسینی دییشیب.

قاش-گؤز

بیر رمزیله یاریرن ائدر اهلی-دیله قاش-گؤز،
تاری بیلی، خالق ائیله‌یه بیلمز ائله قاش-گؤز.

تاپشیردی صبایه، دئدی: سال زلفو اوز اوسته،
ایمانیمی وئردی منیم آخیر یئله، قاش-گؤز.

بیر ایری قاش اویناتماغا وئردیم گؤزه مین جان،
بوندان بئله ائیلر گئنه مندن گیلئ قاش-گؤز.

هرگز، بو خطادیده کیمی قاش-گؤز ائدممز،
گر عینی خطادان گله مین قافیله قاش-گؤز.

بیر یایدا مین اوخ آتا، بیر تیری یایلماز،
قویموبدو، آتیب وورماق اوچون، فاصله قاش-گؤز.

انسان دئمک اولماز سنه، سن حورو پریسه‌ن،
اولماز، بو مشخصدی، بشرده بئله قاش-گؤز.

گؤز مردمکین-نقطه، قاشین-سینی-کشیده،
سرلوحی-جامالیندا اولوب بیسمیله قاش-گؤز.

مین عاشقی بیر تک توک ایله توک-توکه باغلار،
زلفونده اشاره قیلا گر بیر تئله قاش-گؤز.

گؤز اوسته دئدین، قاش ائیله‌ییب جانینی آللام،
قربانین اولوم، دؤنمه سؤزوندن، ائله قاش-گؤز.

ائیلر بو قدر عالمه قاشو گؤزو تعریف،
وئرمز نیه صرافینا یاریم، سیله قاش-گؤز؟