بو گون آذربایجانین تانینمیش شاعر و یازی‌چی‌سی سهراب طاهرین آنیم گونودور.

Kult.az خبر وئریر کی، او، ۱۹۲۶-جی ایل مایین ۲۷-ده گونئی آذربایجانین آستارا شهرینده آنادان اولوب.

شاعرین آتاسی ابولفز طاهیر کرمانشاه شهرینه سورگون ائدیلدیی اوچون سهراب عائله‌سی ایله بو شهره گئدیب و ایلک تحصیلینی کرمانشاهدا آلیب.

بیر مدت سونرا تبریزه قاییدان سهراب طاهیر، ۱۹۴۶-جی ایلده جنوبی آذربایجان میللی حکومتینین کادر تربییه‌سی پروگرامی چرچیوه‌سینده اونیورسیتت‌ده اوخوماق اوچون سووت سوسیالیست آذربایجان رسپوبلیکاسینا، باکی شهرینه گؤندریلیب.

میللی حکومتین سقوطوندان سونرا تبریزه قاییدا بیلمه‌یه‌ن شاعر باکی‌دا تحصیلینی داوام ائتدیریب.

۱۹۵۰-جی ایلده باکی تیبب مکتبین‌ده ایستوماتولوق و فئدشرلیک ایختیصاسی آلیب. او، ۱۹۵۲–۱۹۵۷-جی ایللرده آدو-نون فیلولوگییا فاکولته‌سینده اوخویوب. ۱۹۵۹–۱۹۶۱-جی ایللرده مسکوادا ماکسیم گورکی آدینا عالی ادبیات کورسلاریندا مداویم اولوب. ۱۹۶۲–۱۹۶۶-جی ایللرده آ.د.ف-این باکی کمیته‌سین‌ده بیرینجی کاتیب، "آذربایجان" قزئتی و ژورنالی رئداکسییالارین‌دا بدیعی شعبه‌لرده مودیر، "سحر" ادبی-تاریخی ژورنالیندا باش رداکتور معاوینی، ۱۹۸۴-جو ایلده‌ن "آذربایجان" ژورنالین‌دا رداکتور وظیفه‌سین‌ده چالیشیب.

انقلابی، ادبی-اجتماعی فعالیتینه گؤره تبریزده "۲۱ آذر" مدالی و بیر سیرا باشقا مئداللارلا، آذربایجان اس.اس.ار.ای عالی سووئتی ریاست هئیتینین فخری فرمانی ایله تلطیف اولونوب.

۲۰۰۶-جی ایلده آذربایجان رسپوبلیکاسی پرزیدئنتی ایلهام علیئوین سرانجامی ایله "شهرت" اوردنینه لاییق گؤرولوب. ۲۰۱۰-جو ایلده روسییا یازیچیلار بیرلیگی و اونون مسکوا شهر تشکیلاتی نزدینده فعالیت گؤسترن یازیچی-ترجمه‌چیلر بیرلیینین قراری ایله بین‌الخالق مایاکووسکی اوردئنی ایله تلطیف ائدیلیب.

آز یاشلاریندان گونئی آذربایجان‌دا باشلایان میللی-دموکراتیک حرکاتین شاهیدی اولان سهراب طاهیر، عمرونون سونونا کیمی بو تأثیر آلتین‌دا اولموشدور.

اونون یارادیجیلیغینین اساس حیصه‌سینی گونئی آذربایجان مسئله‌سی، آنا دیلی، گونئی آذربایجان‌دا باش وئرن انقلابلار و آذربایجانین ایکییه بؤلونمه‌سی باره‌ده یازدیغی نظم و نثر اثرلر تشکیل وئریر.

وطنله سئوگی آراسیندا (شعیرلر و پویمالار)، قونشو قیزین مکتوبلاری (پووست و رومان)، امانت (پووستلر)، لیریکا، سئوگی افسانه‌سی (شعیرلر و پویمالار)، انقلاب قارتالی (رومان)، وطن خاطرینه و ب. سهراب طاهیرین چاپ ائدیله‌ن اثرلریندن بیر نئچه‌سیدیر.

خالق شاعری اوزون ایللر شکر خسته‌لییندن اذیت چکدیکدن سونرا ۴ مای ۲۰۱۶-جی ایلده دونیاسینی دییشیب و باکی‌دا ۲-جی فخری خیاباندا دفن اولونوب.

سهراب طاهیرین چوخ سایلی اثرلری، شعیرلری آراسیندا اونو آرازین هر ایکی تاییندا داها چوخ "چؤپوده ایکییه بؤلمره‌م داها" شعیری ایله تانیییبلار.

دردی درد اولموشدو ائلینده منه،
آغلادیم بیر ناشی گولنده منه،
هئچ کس آغلاماسین اؤلنده منه،
من هئچ واخت، هئچ زامان اؤلمره‌م داها.

آزاد قارداشیم وار اونونلا خوشام،
من گرک ساحلی ساحله قوشام،
ایکی بؤلونمکدن ائله قورخموشام،
چؤپو ده ایکییه بؤلمره‌م داها.

دنیزلر دریالار منه دایازدیر،
ان درین بیر چای وار او دا آرازدیر،
منه گؤروش وئرین آزادلیق آزدیر،
گؤروشسم آیریلماق بیلمره‌م داها.

منیم سعادتیم هارداسا بیتدی،
او هاساد گلمیشدی، هاساد دا گئتدی،
منه نه ائتدیسه سعادت ائتدی،
بدبخت سعادته گولمره‌م داها.