خالق آرتیستی زئینب خانلارووا ایللر سونرا مدنیت ناظرلیگی اوچون کامرا قارشی‌سینا کئچیب.

Kult.az یازیر کی، بو باره‌ده ناظرلیک سوسیال مئدیا حسابلاریندان پایلاشیم ائدیب.

«مدنیت سیزینله تانینیر! خالق آرتیستی زینب خانلارووا» آدلی قیسا فیلم‌ده موسیقیچینین صنعتله باغلی فیکیرلری یئر آلیب.

ایفاچی قید ائدیب کی، خالقین سئوگیسینی قازانماق اوچون گرک خالقا حرمت ائد‌سن:

«من آنامی همیشه چوخ سئومیشم. آناما اولان سئوگی صنعتیمه ده وار. اونون قیمتینی آنام قدر بیلیرم. منه هئچ کیم دئمه‌ییب گئت، اوخو! اؤزومون هوسیم اولوب. بیر ده آتام چوخ ایستیردی کی، اوخویوم. بو صنعت اوشاق کیمیدیر. اونو بوراخدینسا، قیمتی اولمایاجاق. قدرینی بیلمک لازیمدیر، بو صنعتی یئره وورماق اولماز. حرمت ده ندیر؟ بالاجا سسینله ده اولسا، اوخو. هردن بیر سو دا ایچ، اوخو، عیبی یوخدور. آنجاق اؤزون اول! هانی شؤکتلر، هانی سارالار، هانی روبابه‌لر؟ بونلار هامی‌سی «میکروفون اوخویان»لاری اولماییب ائ! منی صحنه‌دن دارتیب چیخارمایینجا یورولمورام. صحنه‌یه چیخاندا، منه دونیانی وئریرلر. منیم سویومدور، هاوامدیر، ائله بیر قیمتلی شئی‌دیر کی، اوندان دویا بیلمیرم. چؤرک یئمه‌یه، سو ایچمه‌یه بیلره‌م، آنجاق موسیقی‌سیز یاشایا بیلمره‌م. من زینبم خالقیم اوچون! سیزی، خالقیمی سئویرم! وطن‌سیز، خالقسیز یاشایا بیلمره‌م!».