بو گون آذربایجان، تورکییه و ایراندا تورکولوگییانین اؤنملی سیمالاریندان ساییلان جواد هئیتین دوغوم گونودور.

Kult.az خبر وئریر کی، او، ۲۴ مای ۱۹۲۵-جی ایلده تبریزده آنادان اولوب.

جواد هئیت ایلک و اورتا تحصیلینی تبریز، همدان و تهران‌دا آلیب. اورتا حربی مکتبی بیتیردیکدن سونرا تهران اونیورسیتتینه داخیل اولوب. بورادا تحصیلینی ایکینجی کورسدان دایاندیریب و عالی تحصیلینی تورکییه‌نین ایستانبول اونیورسیتتین‌ده داوام ائتدیریب، ۱۹۴۳–۱۹۴۶-جی ایللرده ایستانبول طب فاکولته‌سینده اوخویوب.

ایران‌دا تانینمیش اورک جراحی کیمی فعالیت گؤسترن جواد هئیت ۱۹۷۹-جو ایلده‌ن سونرا آذربایجان و فارس دیللرینده "وارلیق" درگیسینی نشر ائتدیریب.

پروفسور حمید نیطقی، محمدعلی فرضانه، حسن مجیدزاده ساوالان، کریم مشروطه‌چی (سؤنمز)، منزوری خامنه‌ایی، صمد سردارنییا، غلامحسین بیگدلینین امکداشلیغی ایله نشر اولونان "وارلیق" درگیسی گونئی آذربایجان و ایراندا آذربایجان دیلی و مدنیتینین قورونوب ساخلانیلماسی، اینکیشاف ائتمه‌سینده اهمیتلی رول اویناییب.

جواد هئیت فیلولوگییا و تورکولوگییا ساحه‌سینده "آذربایجان ادبیات تاریخینه بیر باخیش"، "آذربایجان شفاهی خالق ادبیاتی"، "تورک دیلی و لهجه‌لرینین تاریخی"، "ایکی دیلین مقایسه‌سی" کیتابلارینین، طب و تورکولوگییا ساحه‌سینده یوزلرله مقاله‌نین مؤلفیدیر

ایران‌دا ایلک دفعه آچیق اورک عملیاتینی (کورونار شونتلاما) گئرچکلشدیرن جواد هئیت بین‌الخالق جراحلار جمعیتینین ایداره هئیتینین و پاریس جراحلار آکادمییاسینین عضوو اولوب.

عمرونون سون ایللرینی آذربایجان رسپوبلیکاسین‌دا کئچیرن جواد هئیت ۲۰۱۴-جو ایل آوگوستون ۱۲-ده سحر ساعتلاریندا باکی شهرینده دونیاسینی دییشیب.

او، باکینی چوخ سئومه‌سینه باخمایاراق، تبریزده باسدیریلماسینی، ممکن اولمادیقدا ایسه باکی‌دا دفن اولونماسینی وسیت ائتمیشدی.

آنجاق ایران حکومتی اونون تبریزده شهریارین دفن اولوندوغو مقبره الشعرا عابده کومپلک‌سینده تورپاغا تاپیشیریلماسینا اجازه وئرمدیی اوچون او، آوگوستون ۱۵-ده باکی‌دا ایکینجی فخری خیابان‌دا تورپاغا تاپشیریلدی.