مایین ۳۰-او تبریزلی یازیچی، ترجمه‌چی و انقلاب‌چی بهروز دهقانین پهلوی رژیمی طرفیندن ایشگه‌نجه آلتیندا اؤلدورولدویو گوندور.

Axar.az خبر وئریر کی، بهروز عباس‌زاده دهقانی (بیهروز دهقان) ۱۹۳۹-جو ایل مای آیینین ۲۳-ده تبریزین تاریخی لیلاوا محله‌سینده آنادان اولوب.

خصوصی ایستعدادی ایله یاشیدلاریندان سئچیلن بهروز دهقان ایلک و اورتا تحصیلینی آلدیقدان سونرا عائله‌سینین یوخسوللوغو سببیندن اونیورسیتته داخیل اولا بیلمه‌ییب و ۱۶ یاشیندا معلملیک ائتمه‌یه باشلاییب.

اینگیلیس دیلینی مکمل بیلن بهروز دهقان، معلم‌لیک فعالیتی ایله یاناشی بهروز تبریزی امضاسی ایله دونیا ادبیاتیندان چوخ سایلی ترجمه‌لر ائدیب.

بونونلا یاناشی، آذربایجانین اوجقار کندلرینی گزیب-دولاشان دهقان اوشاقلارین تحصیله جلب اولونماسی ایستیقامتینده‌کی مانعه‌لری آراشدیریب، اونلارین داها ماراقلا اوخومالاری و اینکیشافلاری اوچون تدقیقاتلار آپاریب، مقاله‌لر یازیب.

بو آراشدیرمالارین بعضیلرینی صمد بهرنگی ایله بیرگه آپاریلدیغی اوچون نتیجه‌لر ایکی‌سینین امضاسی ایله یاییلیب.

اونون تدقیقاتلارینین چوخ حیصه‌سینی آپاردیغی گونئی آذربایجانین قاراداغ بؤلگه‌سینین فولکلورو و مدنیتی ایله باغلی اوزون آراشدیرمالارینین نتیجه‌سی اولان اثرینین نشرینه اجازه وئریلمه‌ییب.

دهقان مده‌نی فعالیتی ایله یاناشی او زامانلار داها یایقین اولان انقلاب‌چی سوسیالیزم جریانینا ماراق گؤستریر.

باجیسی اشرف دهقان، روهنگیز دهقان، قارداشی محمد دهقان، یاخین سلاحداشی کاظیم سعادتی، مشهور یازیچی و انقلاب‌چی علیرضا نابدل‌له (اوختای بیرگه) ایران خالق فدای پارتیزانلار تشکیلاتینی یارادیرلار.

بیر نئچه ایل فعالیتلری نتیجه‌سینده ایران، خصوصیله، گونئی آذربایجان بؤلگه‌لرینده جدی نفوذ و ایمیج قازانان تشکیلات پهلوی رژیمینین تهلوکه‌سیزلیک اورگانی اولان ساواک-این اساس هدفلرین‌دن بیرینه چئوریلیر.

۲۱ مای ۱۹۷۱-جی ایلده بهروز دهقانین تهران‌دا موقتی قالدیغی تشکیلات ائوینین یئری تهلوکه‌سیزلیک مأمورلاری طرفین‌دن آشکار ائدیله‌رک محاصره‌یه آلینیر.

حکومت مأمورلاری اونو سلاح‌لی قارشی‌دورمادان سونرا حبس ائدیر و تهرانین ائوین حبسخاناسینین ایستینتاق بؤلمه‌سینه کؤچورورلر.

بیر نئچه گون ایستینتاق و ایشگه‌نجه‌دن سونرا بهروز دهقان ۳۰ مای ۱۹۷۱-جی ایلده حیاتینی ایتیریر.

بهروز دهقان و دوستلارینین قوردوغو خالق فدایی پارتیزانلار تشکیلاتی حاضردا اونون بؤیوک باجی‌سی، مهاجیرت‌ده اولان اشرف دهقانین رهبرلیگی ایله فعالیتینی داوام ائتدیریر.

اونون قیسا عمرو بویو عرصه‌یه گتیردیی اثرلردن بیر نئچه‌سی آشاغی‌داکیلاردان عبارت‌دیر:

-صمد بهرنگی ایله آذربایجانین کندلری حاقین‌دا رئپورتاژلار؛

-قاراداغ کندلری حاقین‌دا رپورتاژلار؛

-ایتالییا افسانه‌لری، ماکسیم گورکینین حکایه‌لر توپلوسو (ترجمه)؛

-شون اوکی‌سینین حیاتی و اثرلری (ترجمه و ترتیب)؛

-آذربایجان افسانه‌لری- صمد بهرنگی ایله بیرلیکده حاضیرلانیب؛

-ادبیاتی و جمعیتی درک ائتمک (مقاله‌لر، ریلر توپلوسو).