تبریز یاخینلیغیندا یئرلشن لیقوان کندی ایرانلا یاناشی اونلارلا خاریجی اؤلکه‌یه استحصال ائتدیی کئیفیتلی پئندیرینه گؤره مشهوردور.

Kult.az خبر وئریر کی، لیقوان کندی تبریزین ۳۶ کیلومتر جنوب-شرقینده، سهند داغینین شیمالیندا و مهران چایینین کناریندا یئرلشیر.

سهند داغینین اتکلرینده و دنیز سوییه‌سیندن ۲۴۰۰ متر یوکسکلیکده یئرلشدیی اوچون لیقوانین هاواسی قیش آیلاریندا شاختالی، یاز و یای آیلاریندا ایسه ملاییم کئچیر. کند طبیعی گؤزللیکلرینه گؤره شرقی آذربایجانین گزمه‌لی یئرلریندن بیری ساییلیر.

تاریخچیلرین یازدیغینا گؤره، کندین آدی وان اولوب و زامان کئچدیکجه یئرلی اهالینین دانیشیق دیلینده "لیوان"آ چئوریلیب. ایندی ده آذربایجانلیلارین و یئرلی کندلیلرین چوخو لیقوانا "لیوان" دئییر.

حاضردا، تخمیناً، ۷ مین نفر اهالی‌سی اولان لیقوان کندینین اقتصادیاتی حیواندارلیق و پندیر ایستحصالی اوزرینده قورولوب.

ایلده اورتالاما ۱۰۰۰ تن قویون پندیری ایستحصال ائدیله‌رک ایرانین بوتون بؤلگه‌لرینه گؤندریلیر. دونیا بازارینا دا چیخان لیقوان پندیری اونلارلا اؤلکه‌ده دادینا و کیفیتینه گؤره مشهورلوق قازانیب.

بوتون ایران‌دا ان کیفیتلی پندیر اولان لیقوان پندیری قیمتینه گؤره ده بیرینجی یئری توتور.

عمومیتله، ایران‌دا پندیر لیقوان ایستحصالی اولماسا بئله اونون کیفیتلیلیینی بیلدیرمک اوچون "لیقوان پندیری" دئییلیر.

لیقوان پندیرینین کیفیتی کندین زنگین اوتلاقلاریندا قیدالانان قویون سورولرینین سودونون کیفیتی ایله یاناشی حاضرلانما و یئتیشدیریلمه تکنولوگییاسی ایله ده باغلیدیر.

پندیرین یئتیشدیریلمه‌سی اوچون لیقوان کندینین اطرافیندا قایالاردا اویولموش اونلارلا ماغارا مؤوجوددور.

محصول ایستحصال ائدیلدیکدن سونرا آزی ۳ آی مدتینه همین ماغارالاردا عینی تمپراتوردا ساخلانیلیر، تام یئتیشدیریلیر، آردینجا ساتیشا چیخاریلیر.

لیقوان کندینین اؤزونمخصوص‌لوغو هم ده کند ائولرینین قورولوشو ایله باغلیدیر.

لیقوان‌دا تورپاق و اوتلاق اراضیلر دیرلی اولدوغو اوچون کندلیلر تورپاق ساحه‌لریندن داها چوخ اکین و اوتلاق اراضی کیمی ایستیفاده ائدیرلر. بو مقصدله ده ائولرینی پیللکنواری و بیر-بیرینین اوستونده تیکیبلر.

ائولرین بو فورمادا تیکیلمه‌سی و ماراقلی گؤرونتوسو لیقوانا توریس آخینینی تعمین ائدیر.

قید ائدک کی، بیر نئچه ایل اول لیقوان پندیرینین ایران و اورتا شرق بازارینداکی بیرینجیلیینی الین‌دن آلماق اوچون سپاه-آ یاخین شخصلر اؤزلرینین "میهن" مارکالی پندیرین تبلیغاتینا سعی گؤستریب. بوتون سعیلره باخمایاراق، لیقوان پندیری یئنه ده اؤز مشهورلوغونو، لیقوان کندی ایسه ایرانین پندیر پایتختی آدینی قورویوب ساخلایا بیلیب.