۱۹۶۷-جی ایلین مایین‌دا آذربایجان کمونیست پارتیاسینین مرکزی کمیته‌سینین بیرینجی کاتیبی ولی آخوندوو ملا پناه واقیفین آنادان اولماسینین ۲۵۰ ایللیینین گئنیش شکیل‌ده قید ائدیلمه‌سی باره‌ده سویت ایتیفاقی کمونیست پارتیاسینین مرکزی کمیته‌سینه مراجعت ائتمیشدی. واقیفین ۲۵۰ ایللیی ایله باغلی یوبیلئی تدبیری ۱۹۶۸-جی ایلین پاییزیندا کئچیریلدی. باکی‌دا کئچیریله‌ن مراسیم‌ده سووئت اتفاقی رسپوبلیکالاریندان باشقا بولغاریستان، پولشا، کوبا، رومینییا، آلمانییا دموکراتیک رسپوبلیکاسی، تورکییه (خصوصیله سولچو شاعرلر)، ایران، عراق، سودان و دیگر اؤلکه‌لردن قوناقلار دعوت ائدیلیر. سیاهی او زامان اس.اس.ار.ای تهلوکه‌سیزلیک اورگانینین خصوصی آراشدیرماسی ایله ترتیب ائدیلیر. ائله آداملار سئچیلدیلر کی، اونلار گئری قاییداندا سوویت یاشاییش طرزی و رژیمی باره‌ده مثبت فیکیرلر یازا بیلسینلر.

Kult.az خبر وئریر کی، بو سؤزلری تاریخچی عالیم، دوسنت زاور علیئو قید ائدیب.

او بیلدیریب کی، دعوت اولونان قوناقلار ایچریسین‌ده جنوبی آذربایجان‌دان محمدحسین شهریار دا وار ایدی:

«او زامان اونون بو سیاهییا آدینین سالینماسی اوچون محمد آراز چوخ اذیتلر چکیر. بیر نئچه دفعه مسکوایا مراجعت ائدیر کی، شهریار چوخ بؤیوک شاعردیر و اونون آذربایجانا گلمه‌سی سوویتلرین ایران‌دا مثبت تانینماسینا کمک اولاجاق. حتی شهریارین آذربایجان‌دا قالماسی خرجینی ده اؤز جیبیندن چکجیینی مکتوبدا قید ائدیر. مسکوادان راضی‌لیق مکتوبو گلن کیمی محمد آراز تشکیلات کمیته‌سیندن رسمی دعوتنامه گؤندریلمه‌سینه ده نایل اولور. اما…

مکتوبو حاضرلایان شخصلر اونو محمدحسین شهریارین آدینا یوخ، باشقا آداما یازیر و تمام باشقا عنوانا گؤندریرلر. مکتوبو بیله‌رکدن سهو حاضرلاییب یولا سالیرلار. مکتوب شهریارا چاتمیر. گویا «پوچتالیونون دعوتنامه‌نی «سهوه‌ن» باشقا بیر محمدحسینه چاتدیرماسی» بهانه‌سیله اونون باکییا گلمه‌سینی انگللییرلر.

بونا گؤره ده شهریارین آذربایجانا سفری باش توتمور.

مممد آراز نئچه دفعه ایران سفیرلیینه زنگ ائتسه ده، اونا شهریارا مکتوب چاتمادیغینی دئییرلر. بئله‌لیکله، شهریار باکییا گله بیلمیر. مکتوبو قصداً سهو آداما و سهو عنوانا گؤندره‌نلر ده مممد آرازا بئله ایضاح وئریرلر کی، گویا شاه رژیمی اونون گلمه‌سینه مانع اولوب. دئییلنه گؤره، شهریارین باکییا گلمه‌سینه مانع اولانلار ایچریسین‌ده قوجا شاعرلر وارمیش. چونکی شهریار کیمی شاعرین اوردا اشتراک ائتمه‌سی ملا پناه واقیفه شعیر و پویمالار یازانلاری کؤلگه‌ده ساخلایا بیلردی.

پروگرام‌دا شهریارین صمد وورغونون «واقیف» پویماسی اساسین‌دا چکیلن تاماشایا باخیش و اوردا اونون چیخیش ائتمه‌سی ده یازیلمیشدی.

دئییلنه گؤره، مممد آراز نئچه دفعه طیاره لیمانینا زنگ ائدیب قوناقلار ایچریسین‌ده شهریارین اولوب-اولماماسینی بئله سوروشور. اونون گلیشی اوچون اؤز ائوینده آیریجا اوتاق آییریبمیش، حتی پلانیندا وار ایمیش کی، اونو ناخچیوانا، اؤز ائوینه ده آپارسین.

آنجاق یازیچیلار بیرلیینده اولان قوجالار، بولشویکلره شعیرلر، پویمالار یازان شاعرلر شهریارین باکییا گلمه‌سینه مانع اولور. مممد آرازین گؤزلری یولدا قالیر.

بوندان برک سارسیلان مممد آراز ائوه گلیر، گئجه سحره قدر اویاق قالیر و مهشور «گلمه‌دی» شعیرین یازیر:

اومیدلر یوللارا سریلی قالدی

بو آغیر خبردن، بو نس خبردن

گوللر گوللوکلرده دریلی قالدی

شهریار گلمه‌دی.

شهریار یوللانیر آذربایجانا،

یول هانی، یول هانی آذربایجانا؟..»