«سنی دئییرلر» ماهنیم چیخاندا اورمودا منه خیانت ائتدیلر، آرخادان ضربه ووردولار.

بو سؤزلری Kult.az-آ «سنی دئییرلر» ماهنی‌سینین ایفاچیسی کیمی تانینان گونئیلی موغننی ابراهیم علیزاده دئییب.

او، بیر نئچه مدتدیر صحنه‌ده اولماماسینین سببلری حاقیندا دا دانیشیب:

«بو ماهنی یاییلاندا من نئچه ایللر دوز-چؤرک کسدییم انسانلارلا بیر سؤزلشمه امضالادیم. سؤزلشمه‌دن ۶ آی سونرا بیلدیم کی، بو انسانلار نه قدر حقه‌باز ایمیش. همین شخصلر اسپونسورلاردان پول آلیب، قارشیلیغیندا ایسه هئچ بیر ایش گؤرمه‌ییبلر. باخدیم کی، بئله انسانلارلا عینی صحنه‌ده اولا بیلمره‌م. بو، هم اؤزومه، هم ده صنعتیمه خیانت، مدنیته بیر لکه اولاردی. اونلارلا بیرگه خارجی قاستروللارا گئدیب، کنسرت وئرمک ایستمدیم و اؤزومو قربان ائتدیم. صحنه‌یه چیخمادیم. اوتوردوم ائوده. ساده‌جه، اوخودوغوم ماهنیلاری سوسیال شبکه‌لرده پایلاشیردیم».

موغننی زمانینین بؤیوک حصه‌سینی خیریه‌چیلییه صرف ائتدیینی دیله گتیریب:

«داها چوخ خیریه ایشلرینه واخت صرف ائدیرم. کنسرت وئریرم، امکانسیز انسانلاری سئویندیرمه‌یه چالیشیرام. دعوت گؤزله‌میرم، اؤز تشبوثومله خیریه ایشلرینه قوشولورام. اؤزوم آج دا قالسام، احتیاجی اولان انسانلارا یاردیم ائتمه‌یه، ال توتماغا چالیشیرام. کنسرت پروگرامی ایله اونلار قارشی‌سیندا چیخیش ائدیرم. یا دا موغننیلری دعوت ائدیرم. تویلارا گئتمه‌یه چوخ واختیم قالمیر. اثر یازماغی، گوجلو ایشلری گؤرمیی فکرلشیرم».

او، عائله‌سیندن ده سؤز آچیب:

«عائله‌مله واخت کئچیرمیی سئویرم. اوغلومون ۱۱ یاشی وار، آدی آتیللادیر، قیزیمین ایسه ۱۳ یاشی وار، اونون آدی ایسه آتینادیر«.

یارادیجی‌لیغینا توخونان موغننی اونو او تایلی-بو تایلی آذربایجاندا مشهورلاشدیران ماهنی‌سینین ایکی وئرسیادا یئنی‌دن یازیلدیغینی بیلدیریب:

«موسیقی صنعتی ایله چالیشماق منه ائله ذوق وئریر کی، باشقا بیر ایشله مشغول اولا بیلمیرم. حیاتیمدا بیرینجی یئرده موسیقی دایانیر. سون ایللر عرضینده ۱۸ یئنی ماهنی یازمیشام. موسیقی‌سی و سؤزلری اؤزومه عائددیر. «سنی دئییرلر» ماهنیم دا ایکی وئرسیادا یئنی‌دن یازیلیب، «غملی دریام منیم» و «اورمو دریاسی» آلبوموندا یئر آلیب».

موغننی یاخین گونلره باکییا گلجیینی دئییب:

«هئچ بیر پروبلم اولماسا، ۲۰ گوندن سونرا باکییا گله‌جم. بئله بیر نیتیم وار کی، ائمیل بیله ۳-۴ ماهنی‌می آرانژمان ائدک. همچینین، ۲ کلیپیمی ده اورادا چکمیی پلانلاشدیریرام».

او، ان بؤیوک آرزولاریندان بیرینی ده دیله گتیریب:

«بو تایدا کنسرت وئریرم. اما او تایدا ان بؤیوک ایستییم قاراباغدا کنسرت وئرمکدیر. همچینین، باکیدا و دیگر شهرلرده گؤزل بیر کنسرت آرزوسوندایام».