هر کسین دیلینده ازبر اولان "قال، سنه قوربان"ی بعضا خالق ماهنی‌سی کیمی قلمه وئریرلر.

Kult.az خبر وئریر کی، آدیچکیله‌ن ماهنی خالق ماهنی‌سی یوخ، مؤلفی اولان موسیقی اثریدیر.

اصل مؤلفی اولان بسته‌‎‌کار بهرام نصیبووون موسیقی تحصیلی اولمادیغی اوچون سوویت دؤنه‌مینده مؤلفین آدینین چکیلمه‌سینه اجازه وئریلمه‌ییب و ماهنی خالق ماهنی‌سی کیمی تقدیم اولونوب.

سوویت حاکمیتی داغیلدیقدان سونرا ایسه ماهنی اؤز حقیقی مؤلفینین آدی ایله تقدیم اولونماغا باشلاییب.

تاریخچه‌سی ایله باغلی ایسه بئله دئییلیر...

موغه‌ننی ترانه ولی‌زاده بیر گون حیات یولداشی، ایفاچی ایواز حسنوولا دالاشیر و اینجییه‌رک اؤز آتاسی ائوینه گئدیر. بیر مدت سونرا قایناناسی ترانه خانمی ائوینه - ائیوازین یانینا گتیریر. ترانه خانیم حیات یولداشینی ساچ-ساققال ایچین‌ده، کیرلی پال-پالتاردا و سسی باتمیش وضعیت‌ده تاپیر.

ترانه ولیزاده ماسانین اوستونده بیر کاغذ گؤرور. کاغیذین اوستونده ایسه مشهور «قال، سنه قوربان» ماهنی‌سینین سؤزلری یازیلمیش اولور. ترانه خانیم ظن ائدیر کی، بو شعیری ایواز حسنوو اونا حصر ائدیب. اما تاریخی فاکت باشقادیر.

بو حادثه‌دن ایکی ایل اول، یعنی ۱۹۷۰-جی ایلده حاجی‌قبول خالق تئاترینین رژیسورو میریوسیف مانافوو تئاتر اوچون «سوسن-سونبول» آدلی بیر پیس یازیر. پیس‌ده قادین صورتلرین بیرینین دیلیندن «قال، سنه قوربان» آدلی بیر ماهنی ایفا اولونوردو. او، بو شعیرین مؤلفی اولدوغونو دفعه‌لرله مصاحیبه‌لرین‌ده قید ائدیب. همین شعیره بهرام نصیبوو ماهنی بسته‌لییر و داها بیر بند علاوه ائدیر.

بئله‌لیکله، اوزون مدت ماهنینین سؤزلرینین مؤلفی مباحثه‌لی قالسا دا، ماهنینین اوچ بندینین میریوسیف مانافووا، بیر بندینین ایواز حسنووا، بیر بندینین ده بهرام نصیبووا مخصوص اولدوغو بیر چوخ منبع‌لرده قید اولونوب. ایواز حسنوو بو ماهنییا آشاغیداکی بندی علاوه ائتمیشدی:

«گئتمه کیمسه‌سیزه‌م، قال، سنه قوربان.

بو دیلسیز، آغیزسیز لال سنه قوربان»

ماهنینی ۱۹۷۹-جو ایلده ایواز حسنوو دا ایفا ائدیب و چوخ بؤیوک شهرت قازانیب. ایواز حسنووا قدر و ایواز حسنوودان سونرا بو ماهنینین سایسیز-حسابسیز ایفاچیلاری اولوب. تورکییه صنعتچیلری بو اثره دفعه‌لرله مراجعت ائتسه‌لر ده، هئچ بیرینده اصل مؤلفین آدینی قید ائتمه‌ییبلر.