اولی بورادا…

Kult.az چاغداش گونئی آذربایجان ادبیاتی حاق‌دا مقاله‌نی تقدیم ائدیر:

قید ائتدییمیز کیمی بو اثرلر علمی منبع‌لرده گونئی آذربایجان‌دا چاغداش نسرین تملی حساب اولونور. بو رئالیست اثرلر فارس دیلینده یازان دیگر تورک یازارلاریمیزین دا یارادیجیلیغینا تأثیر گؤستریب. ۱۹۵۰-۱۹۷۵-جی ایللرده گونئی آذربایجان‌دا دونیا شهرت‌لی اثرلر یارانیب. بو دورده — ۱۹۶۱-جی ایلده تبریزین گؤرکملی یازیچیسی غلامحسین سائدی ''بیل ازالیلاری'' آدلی کیتابینی یاییملاییب و بئله‌لیکله، دونیانین ان مشهور حکایه‌لریندن بیرینه امضا آتیب. بو اثر آذربایجانین کند حیاتین‌دان بحث ائد‌ن دونیانین ان یاخشی حکایه‌لریندن بیری کیمی تانینماقدادیر. بو دؤورده صمد بهرنگینین ''بالاجا قارا بالیق'' آدلی اثری ده دونیا شهرتلی بیر اثر کیمی اورتایا چیخیب. بهرنگینین حکایه‌لری خصوصیله اوشاقلار و یئنی‌یئتمه‌لر آراسین‌دا مشهورلاشیب. متخصصلر بهرنگینین بو حکایه‌لرینه گؤره اونو ایران‌دا اوشاق و یئنی‌یئتمه‌لر اوچون رئالیست اوسلوب‌دا یازیلان حکایه ژانرینین بانیسی حساب ائدیرلر. بیزیم چاغداش نثریمیز دئمک اولار هله بو گون ده مستقیل دئییل. اؤز میللی دیلینده بؤیوک ادبی اثرلر یازماغا قادیر دئییللر، چونکی آنا دیلینده تحصیل آلمایان یازارلاریمیز دایم بو پروبلمله قارشیلاشیرلار. بونا گؤره ده گونئی آذربایجان ادبیاتیندا نثر دیلیمیز یا تورکییه‌دن یارارلانیب، یا دا قوزئی آذربایجاندان. هر هانسی بیر ادبیاتین فورمالاشماسی و اینکیشاف ائتمه‌سی رئاللیغی عکس ائتدیرمکله یاناشی، هم ده ادبی دیل نورمالارینا اویغون اولمالیدیر. بو گون شاعرلریمیزین چوخو ادبی دیل نورمالارینی انکشاف ائتدیریرلر. بو چوخ یاخشی و اوغورلو بیر آددیم‌دیر. سون زامانلار نثرله یازانلاریمیز دا بو یؤنده اولدوقجا بؤیوک چابا گؤستریرلر. گونئی آذربایجان‌دا ایندی گلوبال دوشونوب میللی دیلده یاراتماق چوخ اؤنملیدیر. میللی دیلیمیزده یارانان یئنی ادبیات دالغاسینین اساسلاری حاضرلانماقدادیر. بو ایستیقامتده فعالیتی داها دا گوجلندیرمک اوچون ترجمه ایشینه دقت یئتیرمک چوخ واجیبدیر. یعنی دونیانی اؤز دیلیمیزده اوخوماق بیزیم اوچون هاوا-سو کیمی گرکلیدیر. چاغداش دوشونجه‌لری اوخویوب اؤیره‌نمک و دونیا بدیعی سؤز صنعتینین الده ائتدیی اوغورلاردان فایدالانماق بو یول‌دا دونیاگؤروشوموزو داها دا انکشاف ائتدیره بیلر.

آردی وار…