بو گون داهی بسته‌کار، آذربایجان پروفسیونال موسیقی صنعتینین بانیسی، موسیقی‌شناس-عالیم، شرقده ایلک اوپرانین مؤلفی کیمی تانینان، اجتماعی خادیم اوزئییر حاجیبیلینین وفاتیندان ۷۵ ایل اؤتور.

Kult.az خبر وئریر کی، اوزئییر حاجیبیلینین فداکار امیی سایه‌سینده آذربایجان میللی اوپرا صنعتینین تاریخی ۱۱۵ ایل بوندان اؤنجه تماشایا قویولان «لیلی و مجنون» اوپراسی ایله باشلانیب.

او، شرق‌ده ایلک اوپرانین بانیسی کیمی تانینیر. اوپئرانین ایلک دیریژورو عبدالرحیم بی حاقوئردیئو، رژیسورو حسین عربلینسکی اولوب. مجنون رولوندا اؤلمز صنعتکار حسین قولو سارابسکی، لیلی رولوندا ایسه آشپاز شاگیردی عبدالرحیم فرجوو چیخیش ائدیبلر. ایلک تماشا ۱۹۰۸-جی ایل یانوارین ۱۲-ده باکی‌دا حاجی زین‌العابدین تاغییئوین تئاتریندا اوینانیلیب.

داهی آذربایجان شاعری محمد فضولینین عینیادلی پویماسی اساسین‌دا حاضیرلانمیش «لیلی و مجنون» یالنیز آذربایجانین دئییل، هم ده شرقین ایلک اوپراسی‌دیر. قوجا شرقین اوپرا تاریخی محض بو گوندن باشلانیب. ایلک اوپرانین اوغورلاریندان روح‌لانان اوزییر بی بیر-بیرینین آردینجا «شیخ سنان»، «روستم و سهراب»، «شاه عباس و خورشیدبانو»، «اصلی و کرم»، «هارون و لیلا» کیمی میللی اوپئرالار یازیب.

اوزییر حاجیبی‌لی یارادیجیلیغینین زیروه‌سی «کوروغلو» اوپئراسیدیر. «کوروغلو» تکجه آذربایجان مدنیتینده دئییل، دونیا اوپرالارینین سیراسیندا عظمتله دایانان پارلاق نمونه‌لردن بیریدیر.

اوزئییر حاجیبیلینین «فیروزه» آدلی یاریمچیق قالمیش بیر اوپراسی دا اولوب. خالق روایتلری اساسیندا حاضرلانان بو اوپرانین موسیقی پارچالاری آراسیندا «فیروزه»نین آرییاسی خصوصیله دیقته‌لاییقدیر.

شرق‌ده ایلک اوپرئتتا ژانرینین یارانماسی دا اوزییر حاجیبیلینین آدی ایله باغلیدیر. داهی بسته‌کارین ایلک موسیقی‌لی کمدییاسی اوچ پرده‌دن عبارت «ار و آرواد»دیر. بو اثر آذربایجان‌دا موسیقیلی کمدییانین ایلک نمونه‌سی‌دیر. اثرین ایلک تماشاسی ۱۹۱۰-جو ایلده اولوب. روللاردا آرابسکی، آغدامسکی و باشقالاری چیخیش ائدیبلر.

مؤلفین ایکینجی موسیقی‌لی کمئدییاسی «او اولماسین، بو اولسون»دور. اثرین ایلک تماشاسی ۱۹۱۱-جی ایلین آپرلین‌ده باکی‌دا اولوب. سونرالار موسیقی‌لی کمدییا مختلیف دیللره ترجمه اولوناراق صحنه‌لشدیریلیب.

اؤلمز صنعتکارین اوچونجو و سونونجو موسیقیلی کومدییاسی «آرشین مال آلان»دیر. بو اوپرئتتا ۷۰-ا یاخین خاریجی دیله ترجمه ائدیلیب، ۱۰۰-دن چوخ تئاترین صحنه‌سینده اوینانیلیب. «آرشین مال آلان» بئش دفعه اکرانلاشدیریلیب، دفعه‌لرله قرامموفون والینا یازیلیب. بو موسیقیلی کمدییا اساسیندا ایلک بدیعی فیلم ۱۹۱۶-جی ایلده چکیلیب. بو، سس‌سیز فیلم اولوب.

اوزئییر حاجیبیلینین ادبی ارثی ده چوخ زنگین و قیمتلیدیر. بوتون عمرو بویو آذربایجان مدنیتینه، موسیقی‌سینه خیدمت ائد‌ن بو اونودولماز شخصیت ۳۰۰-دن چوخ خالق ماهنی‌سینی نوتا سالیب، مارش، کانتاتا، فانتازییا، ماهنی و رومانسلار، کامرا و خور اثرلری یازیب.

بو گون آدینی چوخ افتخارلا قید ائتدییمیز اوزییر حاجیبی‌لی آذربایجان موسیقی مدنیتی تاریخینده ایلک اوپرا، ایلک موسیقیلی کمدییا و بیر سیرا دیگر ژانرلاردا ایلک نمونه‌لرین یارادیجیسی کیمی خاطیرلانیر. اونون ایشیقلی خاطره‌سی خالقینین قلبینده ابدی اولاراق دایم یاشایاجاق.

داهی بستکار ۱۹۴۸-جی ایل نیابرین ۲۳-ده اورک چاتیشمازلیغیندان وفات ائدیب. باکی‌دا بیرینجی فخری خیاباندا دفن اولونوب.