بو گون آذربایجان ادبیاتینین گؤرکملی نماینده‌سی، خالق شاعری جابر نووروزون آنادان اولماسین‌دان ۹۲ ایل اؤتور.

Kult.az جابیر نووروزون «یولداش اؤلوم» شئیرینی تقدیم ائدیر.

یولداش اؤلوم،

هامی بیلیر سن چوخ ائولر اوچورموسان،

میلیونلاری بو دنیادان واخت‌لی-واخت‌سیز کؤچورموسن،

قهرمانلار آپارمیسان بو عالم‌ده یوخدو تای...

یئر آلتین‌دا اولانلارین، یئر اوستوندن چوخدو سایی،

سینه‌لرده چالین-چارپاز داغلار قویوب،

آنالاری، باجیلاری آغلار قویوب،

سن داحیلر سوسدورموسان - ملتلرین افتخاری...

سوسدورموسان، وارلیلاری، کاسیبلاری،

قویماییرسان گؤز آچماغی آدامی سن،

اوشاق ایدیم، بیر گون آلدین اللریم‌دن آتامی سن،

سؤیله، آزمی فیتنه‌لری دفع ائتدیلر الینله...

منیم قاینار موشفیقی‌می محو ائتدیلر الینله،

سن گلنده گوندوز اولور، گئجه اولور،

بشر جان‌سیز ووجودونون قارشی‌سیندا جوجه اولور،

سن ازرائیل نفس‌لی‌سن، سن جهنم قوخولوسان،

سن توفنگ‌دن، سن بمبادان، سن اتم‌دان قورخولوسان،

آپارسان دا بیزی بو دنیادان بیر-بیر،

نه گیزلدیم، بعضا سن‌دن خوشوم گلیر...

نه زمان کی، بیر آلچاقدان، بیر خبیس‌دن،

گرکسیزدن، دیلکسیزدن، اورکسیزدن باج آلیرسان،

باخ او زمان گؤزلریم‌ده اوجالیرسان!

وجدانینی وار-دولته ساتانلاری،

وظیفه‌دن میلیون ال ایله توتانلاری،

نه زمان کی، ایستولوندان قوپاریرسان،

وظیفه‌سیز، شان-شهرت‌سیز بیر عالمه آپاریرسان،

حیاتینی چاتدیریرسان باشا، اؤلوم!

باخ من اوندا سؤیلییرم، یاشا اؤلوم!

قاباغین‌دا قایا ندیر، پولاد ندیر، دمیر ندیر،

دولت ندیر، اوردو ندیر، امر ندیر،

الین‌ده‌دی توپ داغیتماز سارایلارین آچارلاری،

سن محو ائتدین چینگیزلری، باتیلاری، قاجارلاری،

آدولف هیتلر - او آلچاغین اوزرینه آتیلاندا،

سینه‌سینده قوزغون کیمی اوتوراندا،

گؤرونسیدین گؤزه اگر، یویورردیم قاباغینا،

ییخیلاردیم آیاغینا...

بو عالمه جارسان اؤلوم!

هامی اوچون وارسان، اؤلوم!

نه زامان کی، حس ائلدین انسانلارا گرکسیزه‌م،

الهام‌سیزام، دویغوسوزام، اورکسیزه‌م،

بو حیات‌دان تاپ آل منی،

مین یول خواهیش ائیلییرم

آپار منی!