گونئی آذربایجانین ایستعدادلی خواننده‌سی تابان محمدخانینین کولت. آذ-آ مصاحیبه‌سینی تقدیم ائدیریک:

- اولجه، اؤزونوزو تقدیم ائدین.

- ۱۹۸۹-جو ایلده گونئی آذربایجانین خودآفرین رایونونون دیریلی کندین‌ده آنادان اولموشام. اورتا مکتبی دیریلیده بیتیریب، تبریز شهرینین آزاد اونیورسیتتین‌ده محاسیب ایختصاصی اوزره تحصیل آلمیشام. حاضردا شرقی آذربایجانین خدآفرین بولگه سینده یاشاییرام.

- نئجه اولدو کی، موسیقییه گلدینیز؟

- آتام موسیقینی و مغامی چوخ سئوه‌ن بیری‌دیر. اونا گؤره من ده موسیقییه باغلاندیم و اوخوماغا باشلادیم. عسگرلیک بیتن کیمی تبریزده موسیقی صینفینه داخیل اولدوم و ناصر عطاپوردان (عاریف بابایئوین طلبه‌سی اولوب) مغام درسی آلدیم. آردینجا تبریزین اورکسترینه، «دالغا» قروپونا دعوت آلدیم.

- آذربایجان‌دا موسابیقه‌لرده ایشتیراک ائتمیسینیز؟

- یوخ، بو ایل قاتیلماق ایستییردیم، آتام رحمته گئتدیی اوچون ایشتیراک ائده بیلمدیم. ایران‌دا، تبریزده کئچیریله‌ن بیرینجی و ایکینجی مغام فستیوالین‌دا ایکینجی یئری توتموشام.

- گونئی آذربایجان‌دا موسیقینین دورومو اوریینیزجه‌دیرمی؟

- گونئی آذربایجان‌دا موسیقینین دورومو هئچ ده قناعتبخش دئییل. اونا گؤره کی، بایاغی ماهنیلار جدی موسیقیلرین یئرینی توتوب. دؤولت طرفین‌دن ده اینجه صنعته هئچ بیر دستک یوخدور.

- اینسانلارین بایاغی ماهنیلارا احتیاجی نیه یارانیب؟

- چونکی زؤوقلر کورلانیب. قوزئی‌ده روسلاشما گئتدیی کیمی، بوردا دا فارسلاشما گئدیر.

- نیه اساساً دوشونورسونوز کی، قوزئی‌ده روسلاشما گئدیر؟

- ماهنیلاردا و اونسیت زامانی عمومی دانیشیقلاردا روسلاشما اؤزونو گؤستریر. بلکه ده یئنی نسیل بونو مودرن‌لیک حساب ائدیر. بیز فارس رژیمی آلتین‌دا آسیمیلیاسییا اولماق اوزرییک. اؤز دیلیمیزده یازیب-اوخویا دا بیلمیریک. و بوراداکی یئنی نسیل فارس ادبیاتینا، مدنیتینه مئییللنیر. قوزئی‌ده ایسه دوروم فرق‌لی‌دیر. یئنی نسیل بیر پارتلاییش آختاریر کی، روسییایا یاخینلاشسین. اما یئنه ده بیزیم وضعیتیمیز سیزینله برابر دئییل، موقاییسه ائدیله بیلمز. بوردا حکومت طرفین‌دن هئچ بیر قایغی گؤرموروک.

- آز اؤنجه دئدینیز کی، زؤوقلر کورلانیب، اینسانلار بایاغیلیغا مئیل گؤستریرلر. سنجه، بایاغیلاشما پروبلمی قوزئی‌ده ده وارمی؟

- بلی، وار، اما گونئی‌ده داها چوخ‌دور. بیر حال‌دا کی، میللت اؤز دیلینده دانیشا بیلمیر، سیزجه، موسیقی‌سینه یاخینلاشا بیلرمی؟!

- هان‌سی موسیقیلری بایاغی حساب ائدیرسینیز؟

- او موسیقیلری بایاغی حساب ائدیره‌م کی، سؤزلری هئچ بیر معنا داشیمیر و یانلیش اوخونور. همچینین، کومپوتر گوجو ایله ماهنی ایفا ائدیلیر. هان‌سی کی، او ماهنینی جانلی اوخوماغا گوجلری چاتمیر.

- بو بایاغیلاشمانین قارشی‌سینی نئجه آلماق اولار؟

- گونئی‌ده اؤز آنا دیلیمیزی اؤیره‌نمکله بونا نایل اولماق مومکوندور. بوردا هر یئریندن دوران آذربایجانین فخری اولوب. باخیرسان کی، هئچ آذربایجان دیلیندن خبری بئله یوخدور.

- آذربایجان‌لی مغننی و یا خواننده‌لردن اورادا ان چوخ کیم دینلنیلیر؟

- مغام ساحه‌سین‌ده عاریف بابایئو، سخاوت ممدوو، یعقوبمممدوو، سارا خانیم، روبابه، عالیم قاسیموو، آغاخان عبدوللایئو و ب. پوپ موغننیلرین‌دن ایسه داها چوخ طالیب تالح، بریلیانت، نیام الدین موسایئو، اییوب یعقوبوو...عمومیتله، قوزئی‌لی موغه‌ننیلری بورادا داها یاخشی تانیییرلار.