تبریز شهرینین چوخ تیخاج یارانان یئرلرین‌ده وطنداشلاری اینجی‌دن مسئله‌لردن بیری ده یئر اوستو پیادا کئچیدلرینین آسانسور ایشله‌مه‌مه‌سی‌دیر.

شهرین تیخاج‌لی کوچه‌لرین‌ده بیر طرف‌دن باشقا طرفه کئچمک باش‌دان آیاغا پروبلئم حساب ائدیلیر. قزالاردان قورونماق اوچون یئر اوستو کئچیدلردن ایستیفاده ضروری احتیاجلارداندیر. حتی بیر چوخ یئرده کوچه‌نین اورتاسین‌دان چکیله‌ن دمیر مانعه‌لره گؤره پیادالارین بو کئچیدلردن ایستیفاده‌دن باشقا چیخیش یولو یوخ‌دور. آنجاق بو کئچیدلردن ایستیفاده یاش‌لیلار، علی اوشاق‌لی آتا-آنا و یا علیللر اوچون ایشگه‌نجه‌یه دؤنوشور. ائله همین اذیتلری آشماق آدینا دا بو کؤرپولرده آسانسور نظرده توتولوب. اما اوزون زامان‌دیر کی، وطنداشلار بو آسانسوردان ایستیفاده ائده بیلمیر، چونکی ایشلمیر.

تبریزده چوخ‌لو شیکایته سبب اولان دیگر پروبلئم ایسه آوتوبوس دایاناجاقلارینین موناسیب اولماماسی‌دیر. قارلی قیش گونلرین‌ده آوتوبوس‌دان ایستیفاده ائتمک ایسته‌یه‌ن وطنداشلار اوزون مدت دایاناجاقلاردا گؤزله‌مک مجبوریتین‌ده قالیرلار. بو دایاناجاقلاردا چوخ زامان اوتورماق اوچون یئر اولمادیغی سببی ایله مخصوصه‌ن یاش‌لی و کیچیک اوشاغی اولان آتا-آنالار طرفین‌دن ایستیفاده ائدیله بیلمیر.
بو مسئله‌یه ده دقت ائتمک لازیم‌دیر کی، تبریز ایجرا باش‌چی‌سی و اونا باغلی شیرکتلر بو دایاناجاقلار و یئروستو کؤرپولردن پول بئله قازانیرلار. بئله کی، چوخ زامان بو ایمکانلار تبلیغات اوچون ایجاره‌یه وئریلیر. باخی‌می دا یا ایجرا باش‌چی‌سی، یا دا ایجاره ائد‌ن شیرکتین عهده‌سین‌ده اولور. حتی بعضی لاییحه‌لرین حاضرلانماسی بئله بو شیرکتلر طرفین‌دن حیاتا کئچیریلیر. ایجرا باش‌چی‌سی تکجه بو یول‌دان گلیر الده ائت‌سینه باخمایاراق، اورتایا قویولان نتیجه‌یه باخیلدیغی زامان یئنه ان چوخ دقت ائدیلمه‌یه‌ن و گؤرولمه‌یه‌ن میللت‌دیر.

تبریز کیمی بؤیوک شهرده دقت چکه‌ن باشقا بیر مسئله ده معلوللارین شهرده گؤرونمه‌مه‌سی‌دیر. شرقی آذربایجان‌دا ۱۶۰ مین نفردن چوخ معلول وار. آنجاق یوللارین و عمومی خیدمتین موناسیب اولماماسی سببین‌دن بیر چوخ معلول ائوده حبس یاشاماق دورومون‌دا قالیر. بیر حال‌دا کی، آذربایجان جمعیتینین آزی ۴.۲ فایزی معلول‌دور. اما جامعه‌ده اونلاری گؤرمک چوخ چتین‌دیر. آسانسورو ایشله‌مه‌یه‌ن یئروستو کؤرپولر، اوتوراجاغی اولمایان دایاناجاقلار و آوتوبوسلار معلوللارین چکدیی اذیتلردن بیری‌دیر. بونونلا یاناشی بیر ده جامیه‌نین اونلارا اولان یانلیش و اینجیدیجی باخیشیلاری دا، جدی مدنی اصلاحاتا احتیاج اولدوغونو گؤستریر.