نویابرین ۱۶-دا تبریزده کئچیریلن اعتراض آکسییاسی زامانی رژیم مأمورلاری طرفین‌دن تبریز طب اونیورسیتتینین اؤیرنجی‌سی آیلار حقینین اؤلدورولمه‌سی تبریز باش‌دا اولماقلا، گونئی آذربایجان بؤلگه‌لرین‌ده یئنی دالغالانمایا سبب اولدو.

سنتیابرین ۱۶-دا مهسا امینینین اؤلدورولمه‌سیندن سونرا ایران‌دا باش وئره‌ن اعتراض آکسییالاری زامانی فردی، اجتماعی ایستکلر، ائلجه ده، قادین حقوقلاری داها چوخ قاباردیلسا دا، آیلار حقینین اؤلدورولمه‌سیندن سونرا بو، گونئی آذربایجان‌لیلار آراسین‌دا ملی طلبلرین اؤن پلانا چیخماسینا زمین یاراتدی.

خاریج‌ده فعالیت گؤستره‌ن گونئی آذربایجان تشکیلاتلارینین ایران‌داکی عمومی اعتراض آکسییالاریندا ملی شعارلارین سسلندیریلمه‌سی ایله باغلی چوخسایلی توصیه و تکلیفلرینه او قدر ده اهمیت وئرمه‌سه‌لر ده، تبریزلی آیلار حقینین اؤلدورولمه‌سیندن سونرا آذربایجان‌لی اعتراضچیلار ملی شعارلارلا چیخیش ائتمه‌یه باشلادیلار.

ملی حقوقلارین تعمین اولونماسینی طلب ائد‌ن تورکجه شعارلار قیسا مدتده بوتون بؤلگه‌لرده، او جمله‌دن، تبریز، اردبیل، خوی، ملیکان، ماراغا شهرلرین‌ده اعتراضچیلارین اساس شعارلارینا چئوریلدی.

"بیز هامیمیز آیلاریق، آزادلیغا هایلاریق"، "آذربایجان یاتماییب، آیلارینی آتماییب"، "آزادلیق، عدالت، ملی حکومت" حاضردا گونئی آذربایجان شهرلرینده ان چوخ سسلندیریلن، شهرلرین دیوارلارینا یازیلان شعارلاردیر.

حکومتین اویغولادیغی بوتون محدودیتلره باخمایاراق، دکابرین ۲۷-ده تبریزین "وادی رحمت" قبریستانلیغین‌دا آیلارین ۴۰ مراسمی اوچون مینلرله آذربایجانلینین توپلاشماسی، آذربایجان تورکجه‌سین‌ده ملی شعارلار سسلدیرمه‌سی و چوخ سایدا اینسانین حبس ائدیلمه‌سی، سیاسی تشکیلاتلارین گؤره بیلمدیی ایشی آیلارین اؤلومونون بیر نئچه هفته‌ده گؤردویونو گؤستریر.

قید ائدک کی، آیلار حقی ایله یاناشی، سنتیابرین ۲۳-ده کرج شهرین‌ده گنج آذربایجانلی شاعره حدیث نجفی، اوکتیابرین ۴-ده زنجان شهرین‌دن اولان و تهران‌دا چالیشان حکیم پریسا بهمنی، اوکتیابرین ۱۲-ده ایسه ۱۶ یاش‌لی اردبیل‌لی مکتب‌لی اسرا پناهی حکومت مأمورلاری طرفین‌دن اؤلدورولوب.