یاشلی آداملارین بئلینده و دیزلرینده آغریلاردان شیکایتله‌نمه‌سی هئچ ده هاوا ایله علاقدار دئییل.

آخار. آذ خبر وئریر کی، تدقیقاتچیلار ۶۵ یاشدان یوخاری آمریکالیلار اوچون نظرده توتولان طبی سیغورتا پروگرامینین معلومات بازاسیندا حکیمه مراجعتلرله باغلی معلوماتلاری هرطرفلی تحلیل ائدیبلر.

معلوماتلار ۱،۵ میلیوندان آرتیق یاشلی اینسانا و حکیملره ائدیلن ۱۱،۵ میلیوندان آرتیق مراجعته عاییددیر. عالیملر بئل و اویناق آغریلاری ایله باغلی مراجعتلرین سایینی بو اینسانلارین یاشادیقلاری رگیوندا همین گونلرده هاوانین نئجه اولماسی باره‌ده آرخیو معلوماتلاری ایله موقاییسه ائدیبلر.

نتیجه‌ده معلوم اولوب کی، یاغیشلی و یاغمورسوز گونلرده "سوموکلرین سیزیلتیسی" ایله باغلی شیکایتلرین ساییندا هئچ بیر فرق اولماییب. پیس هاوادا بئل و اویناق آغریلاری ایله حکیمه مراجعتلر ۶،۳۵ فایز، یاخشی هاوادا ایسه ۶،۳۹ فایز تشکیل ائدیب.

تدقیقاتچیلار حساب ائدیرلر کی، اولا بیلر، پاسینتلر اؤزلرینی پیس حس ائتدیکلری گون حکیمین قبولونا یازیلا بیلمه‌ییبلر. اونلار حکیمه مراجعتدن بیر هفته اول یاغیشلی هاوانی نظره آلاراق، معلوماتلاری بیر داها تحلیل ائدیبلر. لاکین نتیجه‌لر اوولکینی گؤستریب. حتی بوتون هفته‌نی لیسان یاغیشلاری یاغسا بئله، همین گونلرده سوموک آغریلاری ایله مراجعت ائد‌نلرین سایی ایله یاغمورسوز، گونشلی هاوادا مراجعت ائد‌نلر آراسیندا جدی فرق اولماییب. همچینین هاوا کسکین دییشمه‌یه باشلایان واختلا آغریلارلا باغلی مراجعتلرین آراسیندا هئچ بیر باغلیلیق اولماییب. بونونلا یاناشی، هاوا حتی اویناق آغریلاریندان اذیت چکن روماتوید آرتریتلی مریضلرین وضعیتینه ده تأثیر ائتمه‌ییب.

تدقیقاتین آپاریجی مؤلفی آنوپام جنا بئله نتیجه‌یه گلیب: "سیزیلدایان دیزلر و بئل هاوانین پیسلشجیی باره‌ده قاباقجادان خبر وئریلمه‌سی اوچون هئچ ده دقیق واسطه دئییل". اونون فیکرینجه، بو حالدا اؤزونوتلقینه اوخشار بیر مسئله‌دن صحبت گئده بیلر. اگر سیز فیکیرلشیرسینیز کی، یاغیشلی هاوادا دیزینیز سیزیلدایاجاق، او، حقیقتا ده باش وئریر. بیین بو سسنارینی یاددا ساخلاییر و یئنیدن، دفعه‌لرله تکرار ائدیر.