تبریز دیالکتینده صفتله باغلی اؤزونه مخصوص خصوصیتلر آز نظره چارپیر. بوتون دیالئکت و لحجه لره خاص اولان گراماتیک واسطه لرین مختلف واریانتلاردا ایشلنمه سی بورادا دا اؤزونو گؤستریر.

صفتین درجه لری

تبریز دیالکتینه عآید توپلانمیش ماتریاللار صفتین درجه لرینی بئله قروپلاشدیرماغا امکان وئریر. ١. عادی. ٢. آزالتما. ٣. چوخالتما..

عادی درجه

عادی درجه شکیلچیسیز ایشلنیر. بو درجه دیگر درجه لری معینلشدیرمک اوچون عیار وضیفه سی داشیییر. مثل: قره، گوده، دودوخ (دار)، تول (اوزون)، یاوا (پیس)، ..

آزالتما درجه سی

آزالتما درجه سی مختلف شکیلچیلرین سؤز کؤکلرینه علاوه اولونماسی ایله عمله گلیر، علامت و کئیفیتین عادی نورمادان آشاغی اولدوغونو بیلدیریر. تبریز دیالئکتینده بو درجه نی عمله گتیرمک اوچون استفاده اولونان شکیلچیلر بونلاردیر:

١. راخ- ره خ. مثل: آزاراخ، اکینه جاخنان مشغول اولاللا. بیردا چوخراخ دللاللار تبریزدن اؤزلرین بیر بازارا یئتیررله..

٢. شین. مثل: قره شین..

٣. یاغیز. آذربایجان ادبی دیلینده کی- یانیز شکیلچیسینین فونئتیک جهتدن ده ییشمیش فورماسیدیر.مثل: جمشیددن کاغاز گلن ایلی قیزیم اؤلموشدیی، قره یاغیز بیر قیز ایدی. بولاردان سارییاغیز پالتارری آروات قئییدیب منه باخدی.

٤. سو. مثل: ننه لیغین اوشاخلاری بدبخ اولوپدی، اوغلی دلی سو: کیمیندی. اوردا بی پارجادان قره سو: چرقتیم واردی.

۵. ایمتیل، اومتول.. تبریز دیالئکتینده گئنیش یاییلمیش شکیلچیلردن حساب اولونور. مثل: بوزومتول. گؤیومتول ...