کولت آذ گونئی‌لی یازار سلیمان باری‌نین یازیسینی تقدیم ائدیر:

دیل میللی کیملییین ،تملی ،دیره یی و روحودور. بو اوزدن تورک خالقی کیملیگینی قوروماق ایسته ییرسه هر نه دن اؤنجه دیلینه سایقی گوسته ریب اونو قورومالی دیر. تورک اولوسونا بوتون سالدیریلار ،ظلم لر بیر طرفده قالسین، آنجاق کیملیگیمیزی بوگونه کیمی قورویان آنا دیلیمیز اولوبدور. تورک دیلی اوقدر گوجلودور کی باشقا بیر دیل اونون یئرینه اولسایدی بو سالدیریلارین آلتیندا ازیلیب یوخ اولاردی بیزده اونونلا برابر یوخ اولاردیق. #فارس_شوونیسمی ده بونو اییی جه دوشونه رک ، تورک خالقینی اورتادان قالدیرماق ایچین اونون دیلینی هدف آلیب. آسیمیلاسیون سیاستی اونجه تورکون دیلی اوستونده بو گونه کیمی یورودولوب. دیل آسیمیله سی آلتینداکی خالقلار اوزل لیکله تورکلر کی روسیا ایران کیمی شوونیست رژیملرین تاپدالانماسی نتیجه سینده گرچک کیملیکلرینی ایتیریب یادا زور آلتیندا باش اییبلر آنجاق باغیمسیز اولمادیقلارینا گوره اولوسلار آراسی ایلیشگیلرده رسمیته تانینماییب فارس ،روس کیمی تانینیب بوتون ساحه لرده کی باشاریلاری، قازانجلاری مثلا سیپوردا ، بیلیمده، اکونومیده و...روس وفارس آدیلا تانینیب، اونلارین بایراقلاری قالدیریلیر. دئمک دیل آسیمله سی اولموش میللت گرچک وارلیقلارینی یانی معنوی، اولوسال و اینسانی کیملیکلرینی ایتیریب بیر قول و آلت اولاراق بوتون گوچ ،چیخار و یئتنک لرینی کندیلرینی آسیمیله ائدن دشمنین آماجی یولوندا ایشه توتورلار. بو اوزدن دیل ایله باشقا اولوسال قونولاری قارشی قارشی یا قویوب بیر اؤنجه لیک سورونو اورتایا گتیرمک و اونلارین آراسیندا زورونلو بیر سئچه نک کیمی مساله یه توخونماق یانلیشدیر. بو یانلیشلیق آزربایجان میللی ترپنیشینی یولوندان آزدیریب ،آیریلیقلارا، چاتیشمالارا یول آچابیلر. دیل میللی روح یارادماقدا، میللی وارلیقی تانیتماقدا و میللی اولوشومو اورتایا قویماقدا تایسیز رول اویناییر. یانی دیل میللتلشمه نین تملی دیر. بو اوزدن دیل قونوسونا تاکید ائدیب اؤنجه لیک وئرمک هر بیر میللی چالیشانین بیرینجی گؤره وی دیر. آزربایجان تورکو بیر رسمی شوونیست سیستم ایله کیملیک ساواشیندایسا، دیل سیلاحی ایله اونون قارشیسینا چیخا بیلر. دیل میللتی آیاقا قالدیرا بیلر. آما نه یازیق کی حتی تورک میللیتچی سی ادعاسی اولانلارین دا بیر چوخو آنا دیلینی دوغرو دوزگون یازیب اوخویا بیلمه ییرلر. سانال مئدیادا اولان میللی کانال و توپلوملاردا یازیلان وپایلاشیلان سؤزلرین چوخو فارسجادیر. تورکجه یازیلار، سهو ویانلیشلارلا دولودور. توپلومدا و حتی اؤزل میللی چالیشانلار آراسیندا آنا دیلینه گرکلی اونم وئریلمیر. اؤیرنیب، یازیب، اوخوماسینا گئنیش ماراق گؤسته ریلمیر. گونده لیک دانیشیقلاریمیزدا بئله آنادیلیمیزین نه قدر مظلوم اولدوغو انسانین اورگینی سیخیر. شوبهه سیز فارسجا یازماقلا، تورکچولوکدن ،کیملیکدن و اولوسال حاقلاردان دانیشماق گولونج و توپلومدا ائتکیسیزاولار .قارشیمیزداکی شوونیستلر ده بیزیم ساققالیمیزا گولر. بیز دیلی دیری ساخلامالی ییق دیل ده بیزی. دیلیمیزه صاحیب چیخماق عینی حالدا میللی اویانیش دئمک دیر. آردیجا دوشونجه، اینانج و چابا و دیره نیش ده کسین اولاجاق. دیلینی آلمایان میللت باشقا حاقلارینی آلانماز.