جمله لر داخیلینده ائله کلمه لر اولار کی، اونلار ایش و حرکتین نئجه اجرا اولونماسینی، اجرا اولوندوغو زامانی، یئری، سببی، مقصدی، مقداری و سایره سینی بیلدیریر. بئله سؤزلره ظرف دئییلیر کی، خصوصی نطق حصه سیدیر. ظرفلر نئجه؟ نه جور؟ هاچان؟ نه وقت؟ نه زامان؟ نه قدر؟ هارا؟ نییه؟ نه اوچون؟ نه سببه گؤره؟ و سایره بو کیمی سواللارا جواب وئریر.مثلا: "قطار سرعتله اؤتدو" جمله سینده "سرعتله" سؤزو قطارین نئجه اؤتدویونو گؤستریر و نئجه؟ سوالینا جواب وئریر. فعلا چوخ ایشله دی"جمله سینده "چوخ" سؤزو "ایشله دی" فعلینین مقدارینی بیلدیریر و "نه قدر؟" سوالینا جواب وئریر. "سرعتله" و "چوخ" کلمه لری ظرفدیر.
ظرفلر معنالارینا گؤره دؤرد جور اولور:

١- طرزی حرکت ظرفلری

طرزی حرکت ظرفلری ایشین نئجه ایجرا اولونماسینی بیلدیریر و نئجه؟ نه جور؟ نه حالدا؟ نه طرزده؟... سواللاریندان بیرینه جواب وئریر. طرزی حرکت ظرفلری اوچ جور اولور.

ساده طرزی حرکت ظرفلری

بیر کؤکدن عبارت اولان و ایشین نئجه اجرا اولونماسینی بیلدیرن ظرفلره ساده طرزی حرکت ظرفلری دئییلیر. ساده طرزی حرکت ظرفلری چوخدور. اونلارین ان چوخ ایشلننلری بونلاردیر:
ساکت، جلد، تئز، یاواش، آغیر، یامان، آستا، برک، آشکار، گؤزل، یاخشی، ساغ، آیدین... بونلارین بعضیسی صفتدیر، اؤزلریندن سونرا اسم گلسه صفت اولار، یوخسا ظرف. "یاخشی آدام" ترکیبینده "یاخشی" سؤزو صفت، اما "یاخشی یازیر" ترکیبینده "یاخشی" سؤزو ظرفدیر.