تانینمیش شاعرلریمیزدن اولان آفاق شیخلی اوزون مدتدیر کی، روسییانین پایتاختیندا یاشاییب یارادیر. آفاق شیخلی بو گونلرده اورک آغریلاری ایله باغلی صحتینده یارانان پروبلئمه گؤره مسکوا شهر خسته خانالاریندان بیرینه یئرلشدیریلیب.

معالیجه‌سی داوام ائد‌ن شاعر خانیمین کولت. آذ-آ گؤندردیی سون شعرلرینی تقدیم ائدیریک:

گؤزللیگی دویماق اوچون

خسته خانا پنجره‌سیندن

دونیا داها ایشیقلی،

حیات داها ماراقلی،

اینسانلار داها خوشبخت...

سما داها ماوی،

گونش داها پارلاق،

آغاجلار داها جومرد گؤرونور...

یارپاقلارین یاشیلینا زومرود،

ساری‌سینا قیزیل،

قیرمیزیسینا یاقوت دئمک ایستییرسن.

ال آتیب بیر یارپاق قوپارماق،

اوزونه سورتمک ایستییرسن.

دئمک کی،

گؤزللیگی دویماق اوچون

اونا اوزاق‌دان،

الچاتمازدان باخماق گرکمیش -

خسته خانا پنجره‌سین‌دن!

۱۷.۰۷.۱۷.

***

بیر چیراغین عشقینه یانار

بیر پروانه...

بیر سؤزون دوغولوشونا اؤلر بیر اومید...

بیر حقیقتی یاشاتماغا گئدر

بیر عؤمور...

مین کؤنولده یاشاماقچون دایانار بیر اورک...

۱۸.۰۷.۱۷.

...

ساده لیین تجسسومو،

اومیدلرین قاپی‌سی،

اؤلومله اوز-اوزه دوردوغون یئردیر -

خسته خانا پالاتالاری...

بعضا یئنی‌دن دوغولدوغون،

بعضا سه سون گؤردویون یئردیر...

چارپایی‌سینین باشینا دیکیلر گؤزلرین،

پنجره‌سیندن آسیلار آرزولارین.

آینالاریندا صحیفه لنر حیاتین واراق-واراق...

کیم بیلیر... بلکه بو گون...

بلکه ده... صاباح...