آنا صحیفه ادبیات |
کولت.آذ آیخان آیوازین "او فاحیشهنی سئویردیم" حکایهسینی تقدیم ائدیر:
من او فاحیشیله بارلارین بیرینده تانیش اولموشدوم. معصوم چهرهسی واردی، اوشاق تبسومو ایله گولومسییردی. بیز اونونلا اوتاغا گیرنده بیر آنلیق دوروخدوم.
- نه اولدو؟ نیه کفین یوخدور؟ – سوروشدو چینیمدن توتاراق.
- هئچ...
- سوگیلیندن آیریلمیسان؟
- سئوگیلیم یوخدو.
اوتاغا گیرنده حس ائتدیم کی، من اونا توخونا بیلمهیهجهم. بیر آنلیق قورخدوم. تئز او اوتاقدان چیخیب گئتمک ایستدیم. قورخومون سببی اؤزومه ده بللی دئییلدی. اما بو قورخو سئوگیدن یارانمیشدی. بیر فاحیشهنی سئومک منه قورخولو یوخو کیمی گلیردی.
بیردن آغلیمدان اوشاقجا بیر شئی کئچدی. گویا فاحیشهنی بو قارانلیق دونیادان چیخاریب ایشیقلار دیارینا آپاریرام. ناغیل کیمی بیر شهرده خوشبختجهسینه یاشاییریق.
- نه دوشونورسن؟ سویون ده... – او منی تلسدیریردی. ایندی فیکیر وئردیم کی، آرتیق اتجبالا قارشیمدا دایانیب. بئله تئز سویونماغی عصبلریمه توخوندو، ایچیم بوزا دؤندو.
- نیه بئله تئز سویوندون؟ – سوروشدوم. - من بئله سئومیرم.
- اششی، واخت یوخدو ائ... سن رومانتیکا آختاریرسان.
قفیل خیالیمدا یاراتدیغیم ناغیل شهری گؤزلریمین قاباغیندا دوردو:
- گئدک بورالاردان...
- هارا؟ باشقا یئرده ایستییرسن؟
منی باشا دوشممیشدی، گئدیب پالتارلارینی گئیینمک ایستییردی.
- اوندا قیمت چوخ اولاجاق ها...
- اونو دئمیرم. گل سنی بو حیاتدان خلاص ائدیم.
- نه؟
- دئییرم، خلاص ائلییم ده سنی.
- بوش-بوش دانیشما. – قاققیلدادی، بدنی دالغا-دالغا ییرغالاندی.
بیردن-بیره نه قدر آخماق بیر تکلیف ائتدییمی آنلادیم، باشیمی بولادیم:
- آلینمایاجاق منده.
- ناراحات اولما. - الیمی توتدو. – گئدک.
پولو اوزاتدیم، گؤتورمهدی. الینی چینیمه آشیردی، اهلی-کئف گؤرکمده اوتاقدان چیخدیق. قاباغیمیزا باشقا فاحیشهلر چیخدی، توستونون ایچینده اونلارین پاریلتیسینی گؤروردوم. بیردن آغلیمدان کئچدی کی، ان چتینی اونلاری سئچمک اولور. هامیسی سنه باخیر و سن یالنیز بیرینی سئچمهلیسن. هم ده دوشوندوم کی، فاحیشهلرین هر شئیی اورتادادیر، یالان دانیشمیرلار، (اصلینده اونلارین اویدورما حکایهلر دانیشماسینی چوخ ائشیتمیشدیم) گؤردویون کیمیدیر اونلارین حیاتلاری. و غریبهدیر، بایاقکی حس تزدن بوتون ووجودومو تیترتدی: فاحیشهنی سئوه بیلرم! اؤزو ده چوخ دهشتلی بیر سئوگی اولار بو. هئچ یئره قاچا بیلمرم بو سئوگینین الیندن. هم ده قورخو دا سپیلیردی بو سئوگییه.
- سئوگیلیمدی ائ... – فاحیشه رفیقهلرینه باخیب دئدی، هامیسی گولوشدو. – زور اوغلاندی!
اؤزومو اونون جنگیندن خلاص ائلییب کوچهیه چیخدیم. تئزبازار اوردان اوزاقلاشمالییدیم. بیر ده گؤردوم آرخامجا گلیر، کؤینیینی باغلایا-باغلایا. اوزون آیاقلار پیللهلری ائنیردی.
- سنه سؤزوم وار. – دئدی منیم یانیما چاتمادان.
- بویور...
- بیر ده بورا گلنده ایچمه. یاخشی؟
باشیمی ترپتدیم.
بیر ده اورا گئتمیجکدیم یقین کی. اورا گئتسم، همیشه بو معصوم، اوشاق تبسوملو فاحیشه چیخاجاقدی قاباغیما. من اونو خلاص ائتمیی دوشونجکدیم آخماقجا. او دا منه باخیب گولهجکدی. سئوجکدیم او قادینی. توکورپدیجی بیر سئوگی اولاجاقدی بو.
- ناراحات اولما. – دئیهجکدی. – هئچ کیمه دئمرم.
- سنی سئویرم!
- یاواش، ائشیدیرلر. آداملاری اؤزونه گولدورمه. فاحیشهنی سئومک اولماز.
قولاغیمدا اونون سسی کوچهنین قارانلیغیندا یویوره-یویوره او باردان اوزاقلاشدیم.
تاریخ
2020.04.22 / 10:55
|
مولف
آیتاج قدیراوا
|