کولت. آذ رامیز رؤوشنین «ایلان بالاسی» شعرینی و بو شعیرین گونئی آذربایجاندا یاییلماسی حاقین‌دا بیر خاطره‌سینی تقدیم ائدیر.

«بیر دفعه منه غریبه بیر کاست گؤستردیلر؛ او تایدا، بز قالاسینا یوروش ائد‌ن بیر دسته جاوان بیر اوجاق باشیندا دؤوره ووروب منیم «ایلان بالاسی» شعیریمی ازبردن دئییردیلر. بیردن منه آیدین اولدو کی، بو شعیر هم ده آزادلیق حاقیندادیر. چونکی همین آندا او آداملار «ایلان بالاسی» شعیرینه اؤز مزمونلارینی گتیریبلر. منجه، بیزیم یازیب چاپ ائتدیردییمیز هر بیر شعیر، اگر دوغرودان دا شعیردیسه، بئله‌جه، مؤلفدن آیری، اوخوجولارلا بیرگه اؤز تالعینی یاشاییر. او شعیرلرین هانسیسا بیزدن اول، هانسیسا بیزدن سونرا اؤلجک.»

بؤیویور بو کؤرپه ایلان بالاسی،
گاه او باشا، گاه بو باشا سورونور.
سئوینیر اوددوغو هاوایا، سویا،
تورپاغا سئوینیر، داشا سئوینیر.
بیر سئوگی هوه‌سی دولور جانینا،
گئجه‌لر گؤزونون ایتیر یوخوسو.
چیچیین قوخوسو،
اوتون قوخوسو،
کولیین نفسی دولور جانینا.
...اؤزوندن خبرسیز،
سس‌سیز-سمیرسیز
زهره چئوریلیر جانیندا هر شئی...
بو ایلان بالاسی بیر واخت
جانیندا
گیزلنه‌ن زهردن خبر توتاجاق.
بلکه قارغییاجاق
باختینی اوندا،
بلکه بوغازینی
قهر توتاجاق.
آغلاما، آغلاما، ایلان بالاسی،
باختینی قارغیما، ایلان بالاسی!
بو دا بیر عؤموردو،
دؤزه‌سن گرک،
بئلیمیش تالعیین امری، بویروغو؛
دؤشونون آلتیندا –
سئون بیر اورک،
دیشینین آلتیندا –
زهر تولوغو.
گؤره‌نلر چیغیرار:
ایلان وار، ایلان!..
قوودوقجا قووارلار سنی دونیادا.
هر یاندان کسیلر
یولون-یولاغان،
تک بیرجه یول قالار سنه دونیادا؛
باشیندان
قویروغوناجان،
زهرلی دیشیندن
قویروغوناجان
تک بیرجه یول قالار، –
او یول اؤزونسن،
اؤزون اؤز یولونسان، ایلان بالاسی.
اؤزون بو دونیادا
اؤز عزیزینسن،
اؤزون اؤز بالانسان، ایلان بالاسی.
هارا قاچاجاق‌سان
گؤز قاباغیندان،
بو ظالم دونیایلا نئیله‌یه‌جکسن؟
یوز یول چیخاجاقسان
اؤز قابیغیندان،
اؤزوندن آیریلا بیلمه‌یه‌جکسن.
اؤیرن،
یاواش-یاواش اؤزونه اؤیرن،
دونیانین هر جوره اوزونه
اؤیرن.
باریش، جانینداکی زهرلی دردله،
ایره‌نمه اؤزوندن، ایلان بالاسی.
بلکه ده، ان آجی حقیقت ائله
سن‌سه‌ن یئر اوزونده، ایلان بالاسی.
سن‌سن حاقین یولو بو یئر اوزونده،
تانری اؤزو سئچیب بو یولو بلکه.
یوز جور سیفتیله، یوز جور اوزویله
دونیا سندن کئچیب دورولور بلکه...