کولت. آذ گونئی‌لی شاعر علی اقدامین شعرینی تقدیم ائدیر:

چکمه لر آلتیندا تاپدانیب شهر
کوچه لر قیریلان دامارلار کیمی
بیر طرف ده روس لار بیر طرف ده بیز
یاغیردی گؤیلردن گولله قار کیمی

بیز ۴ یولداشییدیق سانکی بیر بدن
بیریمیز گؤزویدو بیریمیز قولاق
بیریمیز چیرپینان دؤیونن اورک
بیریمیز "وطنیم" باغیران دوداق

توپلار آچیلیردی تاتا تاق تا تاق
بئینیمدن کئچیردی بیر قار گولله سی
اوشاقلیق ، کوچه میز ، اویون هاواسی
حیط دن گلیردی آنامین سسی

-ایندی آتان گلر تئز اول گل ائوه
الیندن آز قالیر اود توتوب یانام
توپلار آچیلدیقجا بؤیویوردوم آه...
گؤمولوب توستویه ایتیردی آنام

بیز ۴ یولداشییدیق آدیمیز تبریز
آدیمیز قورخویدو دوشمان جانیندا
بیز ۳ یولداشییدیق بیز ۲ بیز ۱
گؤزلریم اوزوردو دوستلار قانیندا

آرتیق تک قالمیشدیم ، اویان به اویان
هئچ کس سس وئرمیردی سسیمه آمان
کورویدوم ، کارییدیم ، اؤلویدوم بلکه
وطنیم دئییردیم یوخویدو دویان

غفیلدن کیشنه دی قاشقا بوز بیر آت
کیم گؤروب آت اوسته گؤزل بیر مارال
-الینی وئر منه دؤنک گئرییه
فیکیرین هایاندا ؟ گئدیم سن تک قال ؟

چاپ ها چاپ چاپیردیق امیره قیز دا
های دوشدو ستارین گلیر قوشونو
آغاجلار بویلاندی یوللارا باخسین
هامی اوچوردوردو اورک قوشونو

***
مشروطه پارکیندا سئوگیلیم له من
بیریسی آت اوستن بیزه باخیردی
آتامین کئچمیشین دئدیکجه اونا
ریحانین گؤز یاشی قان تک آخیردی ...