بو گون آذربایجان اصیللی یازیچی، شاعر رضا براهنینین دوغوم گونودور.

کولت. آذ خاتیرلادیر کی، ۱۹۳۵-جی ایلده کاسیب بیر عائله‌ده دوغولان رضانین آتا-آناسی دا، خانیمی دا تبریزلیدیر. خاریجده‌کی آغالاریندان دستک آلان رضا شاه اوردونو آذربایجانا یئریدندن، دموکرات پارتییاسینین عضولرینه، طرفدارلارینا دیوان توتاندان سونرا اؤلکه‌ده ایرتجاع حؤکم سوروب. حتی مکتبلرده، دؤولت ایداره‌لرینده آنا دیلینده دانیشماق، یازماق قاداغان ائدیلیب.

تعقیب و تضییقلره باخمایاراق یاشیدلارینین بیر چوخو کیمی او دا گیزلیجه آنا دیلینده کیتابلار اوخویوب. بو دا تورکییه‌یه تحصیل آلماغا گئدنده اونون چوخ کمکینه چاتیب. تورکییه‌ده اونیورسیتت اوخویارکن درس اعلاچیلاریندان اولوب. ۲۴ یاشیندا دوکتورلوق دیسسرتاسییاسینی بیتیریب. تورکییه‌ده اینگیلیس دیلین‌ده تحصیل آلیب دا اینگیلیس ادبیاتیندان دوکتورلوق مدافعه ائد‌ن ایلک عالیم رضا براهنی اولوب. ایرانا قاییدان رضا براهنی عسگر آپاریلیب. سونرا تهران اونیورسیتتینده اینگیلیس دیلی و تطبیقی ادبیاتدان درس دئییب. ۱۹۶۸-جی ایلده «کیشیلیک تاریخی» کیتابینی چاپ ائتدیرمه‌یه چالیشیب. بو مومکون اولماسا دا «حاکم و محکوم مدنیت» مقاله‌سینه گؤره حبس اولونوب.

تعقیب و تضییقلر اونلارین فعالیتینه مانع اولدوغوندان رضا براهنی خاریجده ایشله‌مه‌یه گئدیب. آمریکاداکی یوتا اونوریسیتتین‌ده اینگیلیس دیلی و تطبیقی ادبیاتدان درس دئییب، پروفسور سئچیلیب.

او، ایران ادبیات شناسلیغیندا آوروپا تیپلی ادبی تنقیدین بانیسی و فارس شعیرینده یئنی‌لشمه حرکاتینین اؤنجوللریندن بیری کیمی تانینیب. کلیمه‌لری بیر-بیریله اویناشدیریب، شعیر قالیب لارینی داغیدیب، یئنی فورمالار یارادیب. یارادیجیلیق آختاریشلاری حاکم دایره‌لردن چوخ کهنه قالیب لارلا یازیب-یارادان ادیبلری راحتسیز ائدیب. اؤلکه‌ده فارس دیلیندن باشقا یئرلی دیلله ده یازیب-یاراتماق قاداغان ائدیلدییندن و رسمی یئرلرده دانیشماق یاساقلاندیغیندان یئنی بیر یازیچیلار نسلی یئتیشیب. اونلار فارسجا یازسالار دا آذربایجانین و آذربایجانلیلارین باره‌سینده یازیب.

اونون بیر چوخ اثرلری روسجایا، ایستانبول تورکجه‌سینه، عربجه‌یه، ایسپانجایا و ب. دیللره چئوریله‌رک چاپ اولونوب. ۳ کیتابینا ایسه مؤلفین اینگیلیسجه یازدیغی اثرلری داخیل ائدیلیب. ایندییه کیمی ۵۶ کیتابی چیخیب، بونون دا ۵-ی رومان، ۱۴ شعیر کیتابیدیر.