آنا صحیفه ادبیات |
یاسانین (قانونون) اؤنونده بیر قاپیچی دایانیب. بیر کندلی کیشی اونا طرف گلهرک، گیریش،اوچون ایزن ایستییر اما قاپیچی بو آن اونا گیریش ایزنی وئره بیلمیجیینی سؤیلییر.
کیشی بیر آز دوشونور و گلهجکده ایزن وئریلیب، وئریلمیجیینی سوروشور. قاپیچی دئییر «اولا بیلر، اما ایندی یوخ» . یاسانین قاپیسی آچیق و قاپیچینین بیر قیراقدا دوردوغوندان، کیشی باشینی اؤنه اییب، ایچریه باخماق ایستییر. اونو ایزلهیهن قاپیچی گولومهسهییب دئدی: «چوخ باغلانیبسانسا، قارشی دورماغیما رغما، چالیش ایچری گیرهسن. ایستییرم بیلهسهن کی، من چوخ گوجلویهم. بونلا بئله قاپیچیلارین ان گوجسوزویهم. قاپیچیلار قاپیدان، قاپییا دایانیبلار، هر بیری اؤنجکیندن داها گوجلودور. اوچونجو قاپیچی او قدر دهشتلیدیر کی، اونا باخماقدان بئله قورخورام.» بئله سورونلارلا قارشیلاشاجاغینی فیکیرلشن کیشی دوشونجهلره دالیب اؤزو-اؤزونه دئدی: «سانیردیم یاسا هر آن، هر کیمهسهنین اوزونه آچیق اولمالیدیر.»
ایندی ایسه دقتله قاپیچینین خز گییمینه، یئکه و ایتی بورنونا، اوزون، کوسا و قارا تاتار ساققالینا باخدیغجا، گیریش اوچون دایانماغین مصلحتلی اولدوغونو آنلاییر. قاپیچی اونا بیر اوتوراجاق وئریب، قاپینین بیر قیراغیندا اوتوردور. کیشی گونلر و ایللر بویو اوردا اوتورور. دفعهلرله گیریش اوچون ایستکلری قاپیچینی یورور. قاپیچی آرا – سیرا اونونلا دانیشارکن، هاردان گلدیینی و باشقا شئیلری سوروشور اما اونون سورغولاری اربابلارین سورغولارینا تای قایغیسیزلیق اوزریندن اولاراق، هر دفعه اونون ایچری گیرمهسینین ایزینسیز اولدوغونو وورغولاییر. بو یولجولوغا یاراقلی گلن کیشی هر شئیینی بو یولدا توکهدیر. قاپیچینی یولا گتیرمک اوچون ان دیرلی وارلیغینی بئله اسیرگمیر. قاپیچی هر شئیینی آلیرسادا، هر دفعه بونو وورغولاییر: «بونلارین سندن آلماغیمین سببی، سنی هر یوللا سینادیممی؟ سورغوسوندان قورتارماقدیر.»
داواملی فورمادا ایللر بویونجا کیشی قاپیچینی گؤزدن قویمیور. باشقا قاپیچیلاری اونوداراق، ائله سانیر کی، تکجه گؤردویو بو قاپیچی یاسایا گیریش اوچون انگلدیر. ایلک ایللرده اؤز آلین یازیسینی اوجا سسله، قایغیسیزجا قینایان، یاشلاندیقجا ایسه اؤز ایچینده «میریلداییردی». گئتدیکجه ساییقلاییردی. ایللر بویو قاپیچینی ایزلییر، یاخاسیندا اولان بیرهلری بئله آرتیق یاخشی تانییردی. بیرهلر اونا قاپیچینین فیکرینی دییشمکده یاردیم ائتسینلر دئیه، اونلارا یالواریردی. گؤزهلرینین ایشیغینی الدهن وئرهرک، دونیانین گئرچکدن قارانلیق اولدوغونو، یوخسا گؤزلرینین اونو آلداتدیغینی بیلمز اولموشدو. بونونلا بئله قارانلیق ایچینده، یاسانین قاپیسیندان سؤنمز بیر ایشیغین چؤله سیزماغینی گؤره بیلیردی.چوخ تأسف کی، آرتیق زامانی قالمامیشدی . اؤلومدن اؤنجه، اوزون ایللر بویو یاشادیغی تجروبهلر، بئینینده تکجه بیر سورغونو «قیمیلدادیردی». بو آنادک قاپیچییا سورمامیش اولدوغو بیر سورغونو ایدی او. قورو گؤوهدهسینی قالدیرا بیلمدییندن، ال ایشارتیله قاپیچینی اؤزونه ساری چاغیریر. بو زاما عرضینده کندلینین بویو آلچالدیغیندان، قاپیچی اونا دوغرو اییلمک زوروندا قالیر. قاپیچی سوروشور: «یئنه نیی بیلمک ایستییرسن؟ نئجه دویماز آدامسان سن؟.» کیشی دئییر: «هامی یاسانین آختاریشیندادیر اما نیه بو ایللر عرضینده مندن باشقا بیر کیمسه یاسایا گیریش اوچون ایزن ایستهمهدی؟» قاپیچی کیشینین ایشینین بیتدیینی آنلاییب، اونون سونا چاتمیش ائشیتمه قابیلیتینی اله گتیرمک اوچون باغیریر: «سندن باشقا کیمسه بو قاپیدان گیره بیلمزدی. بو قاپی یالنیزجا سنین اوچون دوزلدیلمیشدی. ایندی ایسه باغلاییرام اونو...»
فرانس کافکا
تاریخ
2020.02.19 / 15:02
|
مولف
الشاد یاقوبلو
|