کولت. آذ گونئی‌لی شاعر-یازیچی ارسطو مجرداین "کولکلری اؤپدوم …" شعرینی تقدیم ائدیر:

بو گون ده گونشی گؤردوم‌،
کولکلری اؤپدوم‌، پنجرنی آچدیم‌،
حَیَطیمیزده الوان رُز بوتالارینی،
دیوار اوسته بیرآن اوتوروب سونرا قوپان قوشلاری گؤردوم‌،
گولدانلاری گؤردوم …

مکتبلی اوشاقلارین سئرویسینی
تئلئفون زنگ‌لرینی‌،
تلویزیون تاماشاسینی‌،
سحر قزئت‌لرینی
و تکرار موزیکلری تکرار بو گونده دینله‌دیم…

ایچدیم‌هاوانی وارلیق سهنگیندن‌، بو گونده؛
یازیلار اوخودوم دویغودان دویغویا کئچه‌رک آجیلی شیرینلی…
بو گون ده ایش یئریم قالابالیق‌، ایش یئریم سویوق‌، ایش یئریم بوش‌، ایش یئریم یوخ…
بو گون ده تانیق اولدوم:

میدان فهله‌لرینه‌،
گؤزل‌،چیرکین بایانلارا…
ایفلیج اوشاغی قونشوموزدا بو گونده گؤردوم …
بو گون ده شه‌هر قالابالیق، شه‌هر سویوق‌، شه‌هر بوش‌، شه‌هر یوخ …

بو گونده گئتمه‌یی دوشوندوم …

ماریا !
داریخیرام‌،
ویزالارا داریخان
پاسپورتوم کیمی!