مغول ائلینه اوغوز خان سویوندان اولان ایل خان حکمدارلیق ائدیردی. او، تاتارلارین دا باشیندا دوران سئوینج خانلا ووروشور، همیشه غالیب گلیردی. سئوینج خان هدییه‌لر گؤندره‌رک قیرغیز خانینی اؤز طرفینه چکدی. مغوللار بوتون دؤیوشلرده اوستون اولدوقلارینا گؤره دیگر تورک بویلارینین اونلاردا قیصاصی واردی. اونا گؤره ده سئوینج خانین اطرافیندا توپلاشیب مغوللارین اوزرینه یئریدیلر. مغوللار محکم دایانمیشدیلار.

سئوینج خان قوشونون مغلوب اولاجاغینی گؤروب حیله‌یه ال آتدی. خان و بیلری توپلاییب گئری چکیلمک، گئدرکن لازیمسیز ماللاری بوراخماق بویروغونو وئردی. مغوللار ائله بیلدیلر کی، دوشمن یئنیلیب قاچیر. محکملندیریلمیش اوردوگاهلاریندان چیخیب، اونلارین آردینجا دوشدولر.

تاتارلار گئری دؤنوب ووروشماغا باشلادیلار، مغوللارین بؤیوکلرینی قیردیلار، کیچیکلرینی ایسه دوستاق ائلدیلر. دوستاق اولانلار ییه‌لرینین سوی آدینی آلدیلار. و مغوللاردان دونیادا اثر-علامت قالمادی.

موغول حکمداری ایل خانین اوغلو قییانلا قارداشی اوغلو نوکوز ده دوستاق اولموشدولار. هر ایکی‌سی تزه‌جه ائولنمیشدی. ایمکان اولان کیمی قادینلاری ایله بیرلیکده قاچیب یوردلارنا گلدیلر. دؤیوشدن اون گون کئچمیشدی. گؤردولر کی، بعضی حیوانلار دا دوشمندن قاچیب یوردا دؤنوب. اونلاری دا گؤتوروب دار داغ جیغیری ایله ال چاتماز، اونیتمز بیر یئره گلدیلر. بو یئر چوخ گؤزل ایدی: آخار چایلار، بولاقلار، چاییر-چمنلر، میوه‌لی آغاجلار، جوربجور اوو حیوانلاری... تانرییا شوکور ائلدیلر.

قیشدا ماللارینین اتینی یئییر، دریلرینی گئییر، یازدا سودونو ایچیردیلر. بو یئرین آدینی ارگنکون قویدولار، یعنی («هوندور داغ یاماجی»). قییانلا نوکوزون اؤولادلاری اولدو، مال-حیوانلاری آرتیب چوخالدی. بؤیوک بیر خالق عمله گلدی. او قدر آرتدیلار کی، ارگنکون اونلارا دارلیق ائلدی. بورایا گلیشلریندن دؤرد یوز ایل کئچمیشدی. بیر گون توپلاشیب صحبت ائلدیلر. بابالاریمیز دئیردی کی، ارگنکوندان کناردا گؤزل، گنیش بیر اؤلکه وار، خالقیمیزی تاتار قیرمیش، اؤلکه‌میزی یاغمالامیش-دئیه سؤیله‌دیلر. - ایندی گرک دده-بابا یوردوموزا قاییداق.

آنجاق دده-بابالارین بورایا قاچیب گلدیکلری دار جیغیری هئچ کیم خاطیرلامیردی. اونا گؤره ده ارگنکوندان چیخیش اوچون یول آرادیلار. لاکین تاپمادیلار. بیر دمیرچی گلیب دئدی کی، بورادا بیر دمیر معدنی وار، اونو اریتسک یول آچیلار.

جاماعت کیمی کؤمور، کیمی اودون گتیردی. بیر سیرا اودون، بیر سیرا کؤمور دوزدولر. دریدن یئتمیش کؤروک دوزلتدیلر. اود ووروب کؤروکلرین هامی‌سینی بیردن کؤروکله‌دیلر. تانرینین کمکی ایله دمیر اریییب یوکلو بیر دوه کچه‌جک قدر یول آچیلدی. ارگنکوندان چیخدیقلاری همین گونو مغوللار همیشه بایرام ائدیرلر. بیر دمیری قیزارانا قدر اوددا ساخلار، سونرا اونو چکیجله دؤیرلر. بو گون «زینداندان چیخیب بابا یوردوم اوزا گلدییمیز گوندور»- دئیرلر. ارگنکوندان چیخیب اؤز اؤلکه‌لرینه دؤننده مغوللارین حکمداری قییان سویوندان اولان بؤرته چینه ایدی. بوتون بویلارا خبر گؤندردی کی، بیز ارگنکوندان چیخیب گئرییه-اؤلکه‌میزه قاییتدیق. بعضیلری سئویندیلر، بعضیلری کدرلندیلر. تاتارلار اونلارین اوزرینه گلدی. بؤیوک بیر دؤیوش اولدو. مغوللار دوشمنی یئندیلر، بؤیوکلرینی قیلینجدان کئچیردیلر، کیچیکلرینی دوستاق ائتدیلر. ماللارینی یاغمالادیلار. بئله‌جه دؤرد یوز ایلدن سونرا تاتارلاردان قانلارینی آلدیلار