آنام ناغیل ائلییردی کی، بیز هله دونیادا اولمایاندا کندیمیزه بیر فالچی گلیب. قالین قارا سورملی بیر قادینمیش فالچی. آنام، یانیندا دا دؤرد-بئش اؤزو آغلیندا قیز گئدیبلر فالچینین یانینا. او زامان فالچی آنامین تالعیینی اوزونه اوخویوب: «کندده بیر اوخوموش اوغلان وار، اونا اره گئده‌جکسن. آرانیزدا بیر ایلان وار...» بو صحبته قیزلار قاققیلداشیبلار. آنام دئییردی کی، او اوخوموش اوغلان دئینده آتامی نظرده توتورموش. همین واخت دا آتام نیشانلی. یعنی فالچی گوپا باسیب.

آرادان سیز دئیین، بیر آی، من دئییم، ایکی آی کئچیب، آتام نیشانی آتیب و اونون تویونا تله‌سن آناما ائلچی دوشوب.

او گوندن سونرا آنام فالچیلارا برک اینانیب. حیاتیمیز چیخمازا گیره‌نده، آنام آراییب-آختاریب بیر فالچی تاپیر، اونا اؤز دردینی دانیشیردی.

گونلرین بیرینده منی ده فالچینین یانینا آپاردی. اوندا مکتبده اوخویوردوم. گئجه‌لر کابوسون دورتمسیله اویانیردیم. آنام شهادت بارماغینی آز قالا گؤزومه سوخا-سوخا دئدی کی، فالچینین یانینا گئدجییک. ایندیکی کیمی یادیمدادیر، کند یولونو آندیران یولون قیراغیندا، ایری چینار آغاجینین یانینداکی حیط ائوینده دومباگؤز فالچینی گؤره‌نده گولمه‌مک اوچون اؤزومو زورلا ساخلامیشدیم.

غریبه‌دیر کی، فالچی هر شئیی اولدوغو کیمی دانیشدی: آتامین بورجا دوشدویونو، قارداشیمین خسته خانادا یاتدیغینی، باجیمین ایمتاحاندان کسیلمه‌سینی.

سونرا اوزون-اوزادی دقتله منی سوزدو. قورخدوم اونون باخیشلاریندان.

من‌دن سؤز آچاندا فالچی باسدی-باغلادی، آنام قولاقلارینا اینانا بیلمدی. دئدی، بو اوشاق کیتاب اوزو آچمیر، هر گون آوارا-آوارا دولانیر. آنام اعتراض ائتدی: «نه دانیشیرسینیز؟ او یازیچیدیر، اثر یازیر. بوتون گونو کیتاب اوخویور».

فالچی توتولدو، والی دییشدی: «سون واختلار دئییرم. هم ده اثر یازماق ندیر کی؟ من ده یازارام».

قادین آیاغا دوردو، الینی اؤلچه-اؤلچه کیتاب یازماقدان، شعیردن، ادبیاتدان دانیشدی. ائله بیل تنقیدچی دانیشیردی. بلکه ده گنجلیینده تنقیدله مشغول اولوبموش. کیم بیلیر؟

آنامین قاشلاری دویونلندی، منی ده یانینا سالیب اوتاقدان چیخدی.

او گوندن فال‌چییا اینانمادی آنام. بوتون چتینلیکلرین عؤهده‌سیندن گلن فالچیلار اونو پیس وضعیتده قویموشدولار. داها بیلمیردی نه ائتسین؟ باشینی هارانین داشینا وورسون.

بیر دفعه شیطانین آیاغینی قیردی، فالچینین یانینا گئتدی. یانیندا دا هرزامانکی کیمی من. اوتاغا گیرمدیم. چؤلده دوروب آنامی گؤزلییردیم.

چیخاندا گؤردوم، اوزو دوماغ اولوب. یولبویو دینیب-دانیشمادی.

سونرادان قونشویلا دانیشاندا اونلارین صحبتینه قولاق موسافیری اولدوم: «دئدی، عائله‌نیزین اوستونو قارا بولودلار آلیب. چوخ چتین سیناق قارشیسینداسینیز...»

ایندی هاردا فالچی صحبتی گؤرسم بو احوالات یادیما دوشور. بیلمیرم، او فالچینین قارا بولودلاری باشیمیزین اوستونو آلدی، یا یوخ. اما غریبه‌دیر کی، چوخ درینلرده فالچیلارا اینامیم وار. آنامی حیرتده قویان او فالچینین دئدیکلری دوغرومو چیخدی دئیه همیشه دوشونموشم.

اونا گؤره ده لاغا قویولان، فیلملرده همیشه ایرونییا هدفینه چئوریلن، قادین دوشکونو کیمی گؤستریلن فالچینین منیم اوچون هم ده سیرلی بیر طرفی وار. او سیرلی طرفی همیشه بیر کناردا ساخلامیشام.

حیاتیمدا الی جیبینده دولاشان بیر میستیکا وار.

من او میستیکانی هر آن حس ائدیره‌م.