کولت. آذ مسعود آذرین شئیر دونیاسیندان "هله ده سئویرم سنی" شعیرینی تقدیم ائدیر:
هله ده سئویرم سنی
مسعود آذر

دیلیمله دوداغیم آراسیندا-
سیخیب تامسینیرام
آیاغیم آلتین اؤپن قامچیلارین
کال گیزیلتی قاریشیق دادینی؛
سانکی الکتریکایا توتولوب،
تیتره‌ییر دوداقلاریم-
اؤپرکن
درینلیگینده گونش بوغولان خومار گؤزلرینی.
هئی…
اوجا بویلو، دلی سئودالی!،
یالقیزجاسینا بوراخیب منی، هارا گئدیرسن؟
دایان، دینله منی!
دوی کؤنلومو!
اینان هله ده،
هله ده سئویرم سنی.
دلی جیران!
گئدیشین، تکی اوره‌ییمی‌یاخمادی،
آرتیق، بئینیمی‌جیزما قارالادی.
گونلر گلدی،
آیلار کئچدی،
زامان اؤتدو،
سن بیر آن یادداشیمدا یادیرغانمادین
بیر آن دا اولسون
دیلیمدن دوشمه‌دی آدین.
دؤن گئرییه بیر یاخشی باخ!
یورغون آخسار
هله ده گلیرم آردینجا؛
گلیرم، اؤپه- اؤپه آیاق ایزلریندن قوخویان
قیزیل آلمالارین بویاسینی.

یادیندامی‌دده‌م بالاسی!
آلما آغاجینین آلتیندا دئدیم:
«کؤک‌سیز یاشاماق اولماز!،
کؤک‌سیز یاشاماق ایسته‌میرم.؟»
هله ده قولاغیمدا سسله‌نیر سنین جوابین:
«کؤکوموز بو تورپاقدا،
بو ائلده، بو یورددا،
بو خالقین دیله‌یینده‌دیر،
دونیا ائللرینین اوره‌یینده‌دیر.»
دده‌م بالاسی!
ایندی ده دینله‌مک ایسته‌ییرم سنی،
آل منی قوللارینا،
ایستی قوجاغینا،
قوناق ائله سیجاق اوجاغینا!
قیزیشدیر اللریمی،
ایسیندیر اوره‌ییمی!
یالقیزجاسینا بوراخما منی!
هله ده
هله ده سئویرم سنی.
۴ شهریور ۱۳۹۵