کولت. آذ گونئیلی یازیچی روزبه سعادتینین "ایکینجی یاری‌نین داریخمالاری!" آدلی یازی‌سینی تقدیم ائدیر:

اوست-اوسته بیزلر چوخ شئیلره حسرت قالدیق. دوغان گونوموزدن پارا بیزدن قاچاق‌ دوشدو. او آتلی ایدی، بیز ایسه پییادا. شاراب دا یاساق ایدی. گیزلی ایچردیک اونو، داریخاردیق و گونو-گوندن آرتاردی دردیمیزی. هردن ده آغلاردیق. سونرالار شارابین دا دادی گئتدی. داریخمالاریمیزین دادی کیمی. اؤز دیلیمیزده داریخمادیق آخی. اؤز دیلیمیزده یاشامادیق آخی. بیز قالدیق و یالنیزلیغیمیز قالدی. سئوگی ده هله چوخ سونرالار گله‌جک ایدی؛ یاشامین ایکینجی یاریسیندا. اوندان اؤنجه شئعر گلدی. «لوایی» اوخودوق، بیراز دا «بیات» و گئجه‌لریمیزین قولاق یولداشی «احمد کایا» اولدو و «مورات گؤیه‌باکان». هردن، «سئزن» ده دینجلیک وئرردی و «هالوک لئونت» ایدی رؤیالاریمیزا کؤلگه سالان. سونرا، نوستالژی‌ ده چیی گلدی بیزه؛ چیریک‌لری گؤرمه‌دیک، ماهنی‌لارینی ازبر اولدوق. دئوریم بیزدن اؤنجه‌‌ ایدی، اونو دا آغیزلاردان ائشیتدیک، تلویزیون‌لاردان گؤردوک. «چگووارا»-نی تیشرت‌لرده یاشادیق. «فیدل»-ی سیقارت‌لرده. «صمد»-ی اوخومامیشدیق، آراز-دا بوغولدو، ماهنی‌لارا یول آچدی. سونرا هر شئی نوستالژیک اولدو؛ صمد، آراز، ماهنی و... ایندی گله‌جه‌ییمیز، یاشانمامیش ایل‌لریمیز ده نوستالژی اولور بیزه! سانکی پاییزلی گون‌لرده، سینه‌سی خیشیلدایان پاپاقلی-پالتولو بیر قوجاییق گله‌جکده، اوتورموشوق صندلده. نه ایسه... ایندی کئچمیش ایل‌لردن بیر ایز ده قالمامیش بیله. یوخو کیمی ایدی سانکی؛ بیر گؤز قیرپیمیندا گلیب، کئچدی گنجلیییمیز. یاشام کول اولدو ساورولدو گؤی‌لره. ان آزی بیرینجی یاریسینی لاپ دادار یاشادیق. قالدی ایکینجی یاریسی. آلتمیشی گؤره‌جه‌ییکسه. سانکی گؤره‌ بیله‌جه‌ییک ده. ایکینجی یاریسینی یالنیزلیقدا باشلامادیق آخی. سئوگی گلمیش ایدی دئیه‌سن.

بیلیر‌سن؟ آدام یاشا دولدوقجا کئچمیشه قاییتماق ایستر. بیر ایل اولسا دا بیله. بیر آی. بیر گون. سن دئه بیر ساعات. قاییدیب تئز آنلایاسان. قاییدیب تئز سئویله‌سن. آرتیق سئوه‌سن. ائله ده هر شئیین رنگی ده‌ییشر. ائله ده دینله‌دییین ماهنی‌لار سئودیک‌لریندن پای اولار سنه، جان وئرر دادسیز ایل‌لرینه. ائله ده یالنیزلیغینین اوستونو اؤرتن ایستی بیر سئوگینی آرتیق یاشایارسان. حسرتسیز قالارسان و کدرسیز... آما بونلار اولاسی دئییل. سئوه بیلمه‌مک قه‌در اولاناقسیزدی بونلار. دئمک قاییتمادان یاشامالیسان. ایستر کئچمیشی دوشونرک، ایسترسه گله‌جکدن قورخاراق... قاییتماق اولمورسا، ان آزی باشقا جور یاشاماق، باشقا جور سئومک کی اولور.