۴۰-۴۵ یاشلی، اوْرتا بوْیلو، بیراز دوْلو ساچلارینا دن دوشموش، گؤزلرینده گؤزلوک و ساغ الینده آلیشمیش بیر سیگار لا هاوانین نئجه دئیرلر قاش قارالان چاغی تله سیک دوکان-ا گیردی.

- سلام

سلام بی. بوُیورون

- قارچ وار؟

گؤزلریم بَره لدی. قوُلاقلاریمدان توستو کی یوْخ دئیه بیللم اوْد چیْخدی. آما ائل دارلیق دی. نئیله مک گره ک سس-یم چیْخمایا. بیراز دایانیب سوْنرا گئدیب گؤبه لک قابیْن گتیردیم.

" نه قدر ایستیرسیز؟ "- دئیه سوْروشدوم

- یاریْم کیلو

گؤبه لک لری چکدیم. اؤلچَر ( ترازو) دن گؤتوروب ماسانین اوستونه قوْیاندا آیدیْن بیر سس له :

- س'ایل وووس پلاîت ( سیل ووُ پیله)

دئیه رک آلیْجی نین اوزونه باخدیم.

گؤزلری آچیلمیشدی. گؤزلوگون اوستونده گؤیه دیرنمیش گؤزلرله منه باخیردی. بیر شئی دئیه بیلمیردی. بلکه ده منه سؤیوش وئریر دئیه ده دوشونوردو. اوْنون نه چکدیگینی یاخشی جا باشا دوشوردوم. نئچه دیقه قاباق منده بئله بیر دوُرومو یاشامیشدیم.

گولومسویه رک :

" باش تاپمادیم؛ نه دئدیز؟ " دئدی

- " سیز مندن یابانجی دیلده گؤبه لک ایسته دینیز. اؤزوده قارچ یوْخ غارچ دئیه رک. منده قارشیلیق سیزه فرانسیزجا " بوُیورون س'ایل وووس پلاîت " دئدیم. "

" دؤیمه قاپیْنی ، دؤیرلر قاپیوی " دئمیشلر آتا-بابا لاریمیز.