کولت. آذ میللی-مدنی فعال، گونئی‌لی شاعر حبیب ساسانیانین "یاکاموز" آدلی شعرینی تقدیم ائدیر:

من دنیزده بوغولان آی ایشیغی

سنسَه ساحیلده باخیب،لذّت آلان
ساری ساچلارینی سونبول سایاغی
هؤرمه میش اینجه کمر اوسته سالان

ای منی اؤلدورن هر آخشاملار
صور اسرافیلی،هر صوبح چالان
اوخ آتیر هر باخیشیندان کیپریک
کعبه ی عشقه دؤنَن،آی جان آلان

منه گَل ظولم ائلَمه، عؤمر کئچیر
خسته دوشموش اوره ییم،یولدا قالان
هیجرانین درمانی وصل اولموش،وصل
دولایی دؤنگَه لَره،یولدو سالان

مندَه یوخ یوسف کنعان حوسنو
سن زولیخا،قاپی آردیندا قالان
یاشاییش منلَه چیخیب جنگه ،عجب
ظفرین مارشینی، یوخ ایندی چالان

اُوخو، انّا فَتَحَن-فاتح اولوم
بیچمه یَه حسرتی،میداندا دولان
یاکاموز حضرت عشقه باش اَییر
بیر عؤمور حسرتی، دیللَردَه قالان