آخار. آذ فیکرت قوجانین شعیر دونیاسیندان "من اؤلومو یاشامیشام" شعیرینی تقدیم ائدیر:

من اؤلومو یاشامیشام

چکین ایتیر،
یا یاواش-یاواش، یا دا قفیل.
اؤلوم بودور یا دا قفیل!
میلیون-میلیون ذره‌لره پارچالانیرسان،
سپیلیرسن، داغیلیرسان،
سس‌سیز، سمیرسیز، سنسیز قالیرسان.
اؤزونو تاپا بیلمیرسن،
اؤلمورسن، دیریلمیرسن.
قالیرسان چکیسیزلیک‌ده، کیمسه‌سیزلیکده.
بوردا بیر ایش یوخدو سیزلیک، بیزلیک ده...
زامان، ایچیندن
کئچیب گئدیر، بیلمیرسن.
آغلامیرسان، گولمورسن.
قیسقانجلیغین، آجلیغین، توخلوغون یوخدو.
زامانلا گئتمیرسن
وارلیغین، یوخلوغون - یوخدو!
زامان ایل ایدی، آی ایدی بیلمدیم
کئچدی آن کیمی.
ذره‌لریم قاییتدی.
بئچه وئرن بال آریسی
شاهینین اوستونه ییغیلان کیمی.
قاییتدی آغریم، آجیم،
گؤزومو آچدیم،
باشیمین اوستونده خانیمیم، اؤولادیم، باجیم.
قاییتدی قایغیلاریم، دردیم، چکیم.
آلتیم‌دا چارپایی زاریییردی.
باشیمین اوستونده
گولومسونوردو حکیم.
حکیمه راضیلیغیمی بیلدیردیم باشلا...
اورییم‌ده اؤزومه دئدیم،
آی یازیق ایندی گل
هر شئیی تزه دن باشلا....