آخار. آذ فواد بیلسووارلینین "بو قادین" شعیرینی تقدیم ائدیر:

بو قادین...

یورغون‌دو چؤهره‌سی، غملیدی اوزو
بئزیر بو حیات‌دان، بئزیر بو قادین!
اؤیرشیب دردینی تنها چکمه‌یه،
دردیله اؤزونو ازیر بو قادین!

قارانلیق گئجه‌دن چیخا بیلمیر او،
سئویب، بیر اور‌یه آخا بیلمیر او.
حیاتین اوزونه باخا بیلمیر او...
هاوالی-هاوالی گزیر بو قادین!

دردینی اللها دئییب‌دی... یازیق!
اؤزونو ایچین‌دن یئییبدی... یازیق!
قایغیلار قددینی اییبدی... یازیق!
دوشوب تالعینه اسیر بو قادین!

دییشمه‌یه‌جک...

نه اولسون سئچیلمیر گول‌دن او گؤزل،
یامان آجیدیل‌دی دیل‌دن او گؤزل.
سالیب‌دی لاپ منی الده‌ن او گؤزل،
قوربانی اولسام دا، دییشمه‌یه‌جک.

چتین کی، اینصافا گله‌سی، واللاه...
منه لازیم دئییل بئله‌سی، واللاه!
اولمارام عشقینین کؤله‌سی، واللاه،
حیرانی اولسام دا، دییشمه‌یه‌جک.

وورسام دا عؤمرونه، گونونه زینت،
نه فایدا، وئرسم ده ان بؤیوک قیمت؟
قورسام دا کؤنلومده اونا عمارت،
سلطانی اولسام دا، دییشمه‌یه‌جک.

هئچ یاخشی بیترمی بو ایشین سونو،
اؤزو اونودورسا کیم اولدوغونو؟
بیر گون اوزسه اگر تنهالیق اونو،
حیانی اولسام دا، دییشمه‌یه‌جک.